3581/2024-2025

AIZAWL; the 17^th December, 2024: Vawiin chawhnu khan All Mizoram Karate Association, General Headquarters, Aizawl buatsaihin ni 2 awh tur 28th AMKA State Karate Championship 2024-25 hawnna inkhawm chu Dawrpui Multipurpose Centre, Pipu Tlang Dawrpui-ah nei a ni a. Hon'ble Minister Sports & Youth Services Pu Lalnghinglova Hmar chuan khuallian niin, he Championship inelna hi a hawng ta a ni.

Khuallian Pu Tetea chuan thusawiin,AMKA in  State Championship kum 28 lai in local pui thei hi ropui ka ti a, a bik takin a core team te fak inphu hle a ni. Eng pawl pawh, a lian emaw a te emaw, a nawr kaltu hi mi tam an ni ngai lo. Chutiang bawkin AMKA chawinungtu leh nawr kaltu pawh mi tam in ni ka ring lo a,mi tlem te, AMKA  hmangaiha, atchilh burtu te innih ka ring. Thathlah lovin beih fan fan turin ka ngen duh che u, In hnathawh rah a lang tan mek a ni. Kumin National Level-a Senior inelnaah Gold Medal 5 in la thei hian in thawhrim zia a tarlang hle a ni. National Level-a senior inelnaah Gold medal lak harsat zia chu, naupang ho ten an hriatthiam nan hetiang hian entirna pe I la. Mizo ten Sports discipline kan ngaihnat ber te zinga pahnih chu Football leh Boxing hi a ni. Football-ah hian National level-ah vawi 2 gold kan la chauh a, Boxing, mipa- ah phei chuan kan la la lo a ni.  Karate hi Olympic games-ah a la tel lova, mahse 2026 a Asian Games-ah chuan karate hi a tel chiang a ni. Japan chuan Judo-ah Medal a la teuh tawh a ni. Mizo te hian Judo te hi khel luai luai mai i la, Olympic Medal te hi a hnai mai a ngem aw? ti te ka ngaihtuah thin. Asian Games-ah hian Karate atangin Japan chuan Medal 53( Gold-33,Silver-10 leh Bronze-10) a la tawh a,India chuan Medal ala la ve lo a ni.Chuvang chuan Mizo te hi medal la hmasa ber han ni ta i la, Gold kan lak thei lo pawn Bronze tal, a van nuam dawn em! ti te ka ngaihtuah a ni, a ti. Chumi atan in performance en in, kan coach te pawh in tha tawk chuan a lang a.  National chauh nilo, International pawh tum ngam turin kan Coach te pawh tan la zual sauh turin ka chah che u a ni. Hei hi Sawrkar pawhin a ngaipawimawh  hle a, kum tharah chuan sawrkarin thil lian tak pakhat rampum huap Talent identification programme kalpui a tum a, chumi atan chuan sawrkarin  cheng vaibelchhe ₹2.5 min pe tawh a ni. Talent haichhuah programme hi PPP mode ang a kalpui tur niin, Infiammi, Khawtlang leh Sawrkar tangkawpa hma lakna tur a ni ang. Hei hian full time a hna nei lo coach ni lai mek te leh infiammi chawl tawh  te tan sum lakluhna remchang a siam nghal bawk  dawn a ni, a ti. Mizoram State Sports Council hnuaiah Sports discipline 33 a awm mek a, tun dinhmunah chuan a hran theuh vin hmunhma kan la inngaihtuah sak vek thei hri lo,mahse Multipurpose Indoor stadium Aizawl-ah leh hmun dang 2-ah din tura ruahhman kalpui mek a ni a. Chungte siam zawh a ni hunah chuan AMKA te pawhin In State Level championship buatsaih nan man chawia Hall hawh a ngai tawh dawn lo a ni, a ti.

Vawiin Programme hi Shihan C.Dosavunga, Sr Vice President, AMKA chuan kaihruaiin, Rev. Dr. Lalchawimawia, Executive Committee Member, AMKA Gen. Hqrs in hunserh a hmang a. AMKA member Sempai C.kapthanmawia sunna hun hman niin, Pu R.Zomawia, President, AMKA in thu sawina hun a hmang a.

Sensei Lalropuia Secy. AMKA atangin kumin chhunga AMKA hmalakna te report ngaihthlak a ni a. AMKA Technical Board kaihruaina hnuaiah Karate zirlai naupang ten an thiamthil an entir bawk. 28^th AMKA  State Karate Championship 2024-25 ah hian participant 300 vel an awm a ni.

Pi R.Lalbiakdiki, Executive Committee Member, AMKA chuan lawmthu sawiin vawiin 28^th AMKA  State Karate Championship 2024-25 hawnna programme chu a titawp ta a ni.