2206/2024-2025

September ni 25, 2024: Sorkar laipui dawra Delhi a cham mek, AH & Vety Minister Pu C. Lalsawivunga chuan nimin 24.9.24 khan Union Minister for Fisheries, Animal Husbandry & Dairying Pu Rajiv Ranjan Singh; Minister of State for Fisheries, Animal Husbandry & Dairying Pu George Kurien leh Union Minister for Minority Affairs Pu Kiren Rijiju te leh Ministry-a Secretary leh official pawimawh dangte hmu in Mizoram mamawh hrang hrang a thlen.

Minister Pu C. Lalsawivunga chuan Union Minister for Fisheries, Animal Husbandry & Dairying Pu Rajiv Ranjan Singh hnenah nikum 2023-24 chhunga MVU staff te hlawh tur central sorkar in 25% chauh a pek avang leh, MVU staff ten October, 2023 thleng chauh hlawh an lak avanga an nawrhna te, African Swine Fever (ASF) avanga State tawrhna leh ASF compensation chungchang te, Mizoram chu ruahtui tlak tamna a nih avanga Govt. of India vaccination schedule anga a kal ve theih loh dan te a thlen.

Union Minister Pu Rajiv Ranjan Singh chuan MVU hlawh chungchang chu revised proposal siamin rawn thehlut se, an lo approve tur thu a sawi a, kumin 2024-25 chhunga MVU staff te hlawh tur 25% sanction nghal a ni. North East tana vaccination schedule hran siam dan tur ngaihtuah anih thu leh, ASF compensation chungchang pawh Govt of India in a ngaihtuah zel tur thu a sawi. Union Minister chuan check post tam zawk siamna turin NADCP scheme hmang tangkai turin a chah.

Ministry of Panchayati Raj changtu ni bawk Pu Ranjan Singh nen hian Local Administration Department mamawh te an sawi dun a, Mizoram LAD Minister hian VC-te enkawlna atana Central Scheme - Rastrya Gram Swaraạj Abhiyan (RGSA) chungchang thlenin, 2024-25 atana Central in budget min pawmsak Rs. 103.11 crore atanga 50% chu RGSA guidelines anga release sak thuai turin a ngen a, hei hi Union Minister chuan lo release sak thuai a tum thu a ni. He scheme hnuaiah hian VC House sakna turte, thingtlang khuaa Common Service Centre dinna turte, VC te khawtlang rorelna kawnga an thiamna leh hriatna tipung tura training pekna tur fund te, District Panchayat Resource Centre sakna turte leh thildang pawimawh tak tak a tel a ni. Heng bakah hian VC ten khawtlang hmasawnna hna an kalpuina tur Rural Local Body Grant chungchang te an sawidun bawk.

Minister Pu C.Lalsawivunga hian Union Minister for Minority Affairs, Pu Kiren Rijiju leh Minority Affairs Secretary Dr. Chandra Shekhar Kumar hmu in, Mizoram atanga PMJVK hnuaia project submit te a sawipui a, Union Minister hian Mizoram atanga project submit te a ngaih pawimawh thu leh theih tawpa hma a lo lakpui zel tur thu a hrilh.

Minister Pu C. Lalsawivunga hian Minister of State for Fisheries, Animal Husbandry & Dairying, Pu George Kurien a hmu tel bawk.

Minister Pu C. Lalsawivunga hi Pu Alexander V. Chongthu, Addl.RC; Pi Rosie Lalrinmawii, Sudpt., DC&MA leh Dr. Zohlimpuia, VO (DI&S) AH&Vety Department ten an tawiawm a ni.