2207/2024-2025

Siaha the 25^th September 2024: UD&PA, Siaha bultumin Faina Hapta (Cleanliness Week-2024) Hawnna inkhawm chu vawiin chawhma dar 11 khan DRDO Conference Hall, Siaha-ah hman a ni a, Pu Vanlalchhuanliana, DPO, UD&PA chuan he hun hi kaihruaiin Pu K Chhuabei, Executive Member i/c LAD, MADC chu Khuallian a ni.

Khuallian Pu K Chhuabei chuan faina ngai pawimawha Cleanliness Week hawnna inkhawma kalte chu lawmthu a hrilh a, faina leh thianghlimna kawngah hmasawnna tluan tling a thlen ngei a beisei thu a sawi. EM i/c LAD chuan kum hmasa lamah te pawh Cleanliness Week hman a ni fo tawh a, mimalah leh khawtlangah hmasawnna hmuh tur a awm leh awm loh chu ngaihtuah tham fe a ni, a ti. Sawrkar in faina a ngai pawimawh hle a, India ram chuan faina kawnga rahbi thar kai turin kum 2014 khan Swachh Bharat Mission- (SBM) a lo tan tawh tiin chu hmalakna chuan kum 10 hmel a  hmu ta a ti a, sum leh tha sen tawh ngaituahin hmasawnna chuan duh thu a  sam lo hle a ti a, ‘Siaha mipuite chu nasa lehzuala faina beihpui kan thlak a ngai a, mipui mimir kan fai a, kan tanrual phawt a tul’ a ti.

Nikumah Mizoram puma faina intihsiakna ah Siaha in pathumna dinhmun a luah thu leh District Hospital intihsiakna-ah Siaha District Hospital in pakhatna dinhmun a hauh thu tarlangin lawmawm a tih thu a sawi a, hnung tawlh zawnga kal lovin hmalam pan zel a, tang lehzual turin a  fuih. Solid Waste Managemet Centre changtlung tak neih a pawimawh a ti a, sawrkar pawhin a ngai pawimawh hle a, a hmun hma tur pawh thlan fel tawh niin  siam tan thuai a nih dawn thu a sawi. Kalkhawmnate chu faina chungchanga midang hrilhhretu ni zel turin a sawm a. Faina kawngah leh hmasawnna kawng hrang hrangah midang umpha zel turin thawh ho puiah a sawm bawk.

Addl DC Pu Abraham Beirazi Khithie pawhin thu sawiin Swachhta Hi Seva 2024 chu Swachh Bharat Mission peng pakhat niin September ni 17 a flag off a nih thu a tarlang a, SHS in a ngaih pawimawh tak tak- khaw chhunga hnawm hnawk tam zualna thenfai te, mipui huapzo thei ang bera faina kalpui leh bawlhhlawh sawngbawltu (sanitation workers) te hriselna ngai pawimawh a, an hnathawh ngaihhlut te a ni tiin NGO te leh mipui thawh ho puiah a sawm a, hma kan sawn zual theihna turin theihtawp chhuah turin mipui a sawm bawk a ni.

 Vawiin programme-ah hian faina lama mipuite kawng dika hruai a, mipui hrilhhriatna kawngah hma hruaisak tu tur ambassador ruat nghal niin Siaha District Swatchh Bharat Ambassador tura  ruat te chu :

1)     Lucy Siakhel (Social Media Influencer)

2)     John Beizachhi Phuto (Senior Artist)

3)  Rody H Vanlalhriatpuii (Miss Mizoram 2017) te an ni. Ambassador te aiawh hian Pi Rody H Vanlalhriatpuii chuan thusawina a nei a, faina kawnga theihtawp chhuah zel turin mipui a sawm.

Pi K Lalruatpuii, DEO, SBM (U) leh District Coordinator, PHED SBL (g) aiawh ten Swachhta Hi Seva 2024 report an pe a, SHS puala an hmalakna te leh Cleanliness Week denchhana hmachhawp an neihte an tarlang a, ‘Swachhta Pledge’, Faina thutiam chham rualna chu Pi K Ngosai, DIPRO Siaha chuan kaihruaiin Pi S Lalmuanpuii, Sr LAO, MADC chuan lawmthu sawiin vawiin hun chu tihtawp a ni.

Cleanliness Week hawnna inkhawm denchhan hian Swachh Bharat Cultural Fest leh Waste to Art Exhibition buatsaih nghal a ni a, UD&PA hnuaia Self Help Group ten thil tangkai tawh lo, paih ral mai tur thil tangkai leh mawi zawka siamchhuahte pholanna ‘Waste to Art Exhibition’ neih nghal a ni a, an thil siam chhuahte chu a duh te tan lei theihin an pho chhuak nghal bawk. Cleanliness Week 2024 chu September ni 25 atanga October Ni 2 chhung hman tura ruahman a ni a, Swachhta Hi Seva 2024 hmalakna kalpui mek zulzuia Faina Hapta hi hman tum  a ni.