2208/2024-2025

2024 Mimkut thla ni 25: Vawiin khan Excise & Narcotics Conference Hall, Lungleiah Animal Husbandary & Veterinary Department huaihawta ranvulh chhiarpui (livestock census) 2024 kalpui tura Lunglei District Level Enumerator turte tana ni hnih awh tur training buatsaih chu hawn a ni.

DLE Training on 21st Livestock Census 2024 hawnna hun hi AH&Vety Southern Zone-a Deputy Director Dr Lalthankhumi'n kaihruaiin, Joint Director Dr Lalmakthanga chuan training hi a hawng a. Livestock Census chu India sawrkar programme pawimawh tak a nih angin sawrkar pawhin a ngai pawimawh hle tih sawiin, data rin tlak leh dik a awm theih nan enumerator-te chu fimkhur taka data la khawm turin a chah a. Ran vulh chu ram chhung ei leh bar dinhmun tihhmasawn nana pawimawh leh thawh hlawk tak, chhungkaw tam takin ei zawn nana an hman leh taksa tana chaw ṭha kan hmuh theihna bulpui zinga mi a ni tiin, hei vang hian India sawrkar chuan livestock sector lama hmasawnna tur scheme hrang hrang duangin chak takin a kalpui mek a ni, a ti a. Scheme leh programme atana ruahmanna siam nan chuan census data dik leh felfai neih a ṭul tih sawiin, Southern Zone district 4 aṭanga enumerator tura thlan chhuah zawng zawngte chu ṭha taka training chhuak a, sawrkarin a ngaih pawimawh em em 21st Livestock Census 2024 tihlawhtlingtu ni ṭheuh turin duhsakna a hlan a ni.

Training-ah hian chhim lam district pali (4) - Lunglei, Siaha, Lawngtlai leh Hnahthial aṭangin enumerator 39 an tel a. Resource person Pi Siamthanzauvi Jahau leh Pi C. Lalrammuani te'n ranvulh chi hrang hrang zat (population), a chi hming (breed), kum zat (age) leh a nu nge a pa tih (sex) chipchiar leh dik taka lak khawm dan an zirtir a. Pu Saibiaknunga'n data lak khawm nana Software/Mobile Apps hman dan tur a zirtir bawk a. Zawhna leh chhanna hun hman a ni bawk.

Livestock Census hi kum 1919 aṭang khan India ramah buatsaih ṭan niin, kum 5 dan zelah buatsaih ṭhin a ni a. Census hnuhnung ber 20th Livestock Census kha kum 2019 khan buatsaih niin, 21st Livestock Census hi kuminah buatsaih a ni dawn a. September thla chhung hian enumerator training hi zo tura ruahman niin, October thla aṭangin chhiarpui hi ṭan turin inbuatsaihna kalpui mek a ni.