1849/2024-2025

Aizawl, the 29th August, 2024: A.H & Vety. Minister Pu C. Lalsawivunga leh Horticulture Minister Prof. Lalnilawma te chuan nimin khan Chung Hsing University, Taiwan atanga lokal Prof. Ted Chang leh Zirlai 11 te chu Horticulture Minister Chamber, MINECO-ah an kawm.

Kumin kum tira Prof. Lalnilawma, Horticulture Minister leh Horticulture Department Official-te bakah Pu Jonathan Lalremruata, OSD to Chief Minister-te Taiwan-a an zin tuma an hmalakna leh inremna bawhzuina kalzelah Taiwan-a Chung Hsing University-a Prof. Ted Chang leh a zirlai 11 te'n Prof. Lalnilawma Horticulture Minister chu a Office-ah tlawhin inkawmna hun tha tak an nei a. He hunah hian Prof. Ted Chang leh a zirlaite'n Taiwan atanga thingpui an rawn ken leh India rama kan thingpui neihte hmangin High Mountain Tea siam dan a takin an entir nghal a ni.

Chung Hsing University-a thawktute hian Mizorama kan thingpuite chu lo la tawhin, Taiwan thingpui man to, High Mountain Tea an tih chu a siam theih leh theih lohte an lo zirchiang tawh a ni.

Horticulture Minister hmalakna hian Horticulture Department leh Chung Hsing University-te hian High Mountain Tea siam danah leh thei sawngbawlna kawngah hmalakho an lo rel tawh a ni.

He inkawmhona hunah hian Dr. Shri Dhar, Dean, College of Horticulture, Thenzawl, Central Agricultural University leh a thawhpuite an tel mai bakah Chung Hsing University-te nen hian thawhho theih dan kawng zawn an tum a ni.

Minister-te hi Pu Jonathan Lalremruata, OSD to Chief Minister leh Pu C.H. Lalmuanpuia, Director, Horticulture Department-te bakah Horticulture Department Official-te'n an tawiawm a ni.