College of Veterinary Sciences and Animal Husbandary, Central Agricultural University, Selesih chuan Indian Society of Animal Production and Management (ISAPM) convention vawi 22na a thleng a. He hunah hian AH&Vety Minister Pu C.Ngunlianchunga chu khuallian a ni.
Minister chuan ranvulhtute’n harsatna an tawh thin chingfel tura science thiamna hmanga tanpui dan tur zawnna hun tha an siam chu lawmawm a ti a. Ei leh bara intodelhna turin science thiamna nei ve lem lo farmer te’n an thawh hlawkzia te, India rama cheng mipui zinga a zat ve aia tam chu lo neih leh ranvulha eizawng an nih thu te sawiin an dinhmun chawikanna tur hun remchang siamsak a pawimawh hle a ni, a ti. Pu C.Ngunlianchunga chuan state hrang hrang atanga scientist rual lo kalkhawmte chu convention leh seminar an hman chhungin ranvulhtute tana chhawrnahawm tur thil thar ngaihtuah chhuak tur leh an thil zirchhuahte’n ranvulhtute kawngka a taka a thlen ngei a beisei thu a sawi a ni.
Convention hi Central Agriculture University, Imphal Vice Chancellor (Acting) Prof.M.Premjit Singh chuan kaihruaiin India ram mipuite, a bik takin hmarchhak biala cheng te’n ei leh bar hnianghnar an dawn theihna tur a ranvulh pawimawhzia a sawi a. Convention hmang tura lokal mithiam tak tak te’n rampum huapa ranvulh lama hma kan sawn theihna tur ngaihtuah a, finchhuah tur leh an thil rawt chhuah te chu ramin a mamawh ang zela sorkar nena tang tlanga hma lak zui tul a tih thu a sawi a ni.
Hawnna inkhawmah hian hnathawh that avangin Dr.S.Shanmugasundaram leh Dr NN Bora te’n Life time Achievement Award an dawng a. An ni bakah hian Dr SK Das, Dr Venkata Raman, Dr M Mahendar leh Prof Thangarajan te’n National Fellow Award an dawngin Mizo zinga BVsc hmasa ber leh hun rei tak chhung State AH & Vety Director nihna lo chelh tawh Dr R.Kapthuama chawimawina hun hman a ni bawk.
Vawiina neih tan he convention ah hian ‘Livestock Production Practices for Small Farmers of Marginalised Groups and Communities in India’ tih thupui hmangin seminar neih nghal a ni a. January ni 30 thleng neih chhunzawm a ni ang. He national seminar hawnna inkhawmah hian ISAPM President Dr.K.Sarjan Rao, CAU Imphal atanga lokal Director of Instruction Dr.SS Nagra te pawhin thu an sawi a. Seminar chhim tur hian ram chhung hmun hrang hrang atangin mithiam 100 rual zet an tel a ni.
