Vawiin khan lehlangin AH & Vety. Minister Pu C. Ngunlianchunga chuan NLUP hnuaia bawng vulh thlangtute hnena sem chhuah tur bawngpui te hriselna endik paha vulh lailawkna (quarantine shed), Vairtengte khaw daia mi chu a tlawh a. Bawngpui 31 te chu vawiin vek khan Serchhip district-a NLUP hnuaia bawngpui vulh thlangtute tan pek chhuah nghal a ni.
AH& Vety. Minister Pu C: Ngunlianchunga chuan, "NLUP hnuaia 1st Phase-a kan bawng sem te kha state hla tak tak atanga kan lakluh te an nih avangin harsatna kan tawk a. Tunah chuan kan thenawm state - Assam leh Meghalaya atangin kan lei a, a vulhtu turte ngei pawh an bawng duhzawng thlang turin a leina hmunah hian an kal ve a. Chuvang chuan, 2nd Phase hnuaia ruahmanna tharah hi chuan kan ruahmannate pawh nasa takin a phuisui tawh a ni" a ti. Bawng vulh thlangtute chu taimakna leh tumruhna nen hlawhtling ngei tura an bawngpuite enkawl tura fuihin, "Sa leh bawnghnuteah te kan intodelh lo em em a, NLUP hnuaia sem tur chu sawi loh, inpuichhuah tur ran nei pawh kan awm mang tawh lova, chuvang chuan ran vulh tur leinan state pawnah NLUP pawisa tam tak a luang chhuak a. Tuna kan bawng sem tak te atang hian ran note te vulh tur kan inthlah puntir ang a, sa leh bawnghnuteah intodelh ngei tuma tan kan lak a tul tak meuh a ni" Minister chuan a ti bawk. Bawngpui vulh thlangtu, Mizoram hmun hrang hranga mite chu harsatna an tawk a nih chuan Veterinary lama doctor thiamte berawn thuai tura chahin, "In harsatnaah englai pawha pui tur che u in Department chu kan inpeih reng a ni" a ti bawk.
AH &Vety Department hnuaiah hian 2nd phase-ah chhungkaw 380-in bawng vulh an thlang a, bawngpui 2 zelin, bawng 760 sem tur a ni. Bawngte hi Shillong leh Guwahati atanga lakluh an ni a; Saiha, Lawngtlai leh Lunglei district-ah chuan sem zawh tawh a ni a, vawiinah Serchhip district tan pui 31 pek chhuah a ni a, a vaiin bawngpui 130 chu NLUP tnd Phase hnuaiah sem a ni tawh a ni. Chawlhkar tharah khian bawngpui engemaw zat lo thleng leh tura beisei a ni a, Kolasib district-ah bawngpui 69 sem a ni ang.
Bawng te hi Mizoram-a phurh luh an nih hmain Meghalaya sawrkar hnuaia Vety. Doctor-ten an hriselna an enfiah hmasa vek a, certificate an siamsak vek hnuah Mizoram AH&Vety. staff te vilna hnuaiah Mizoram rawn thlen an ni a, Vairengte-ah hahchawlh tirin, a hrisel tha te chauh pek chhuah an ni thin a ni. Vawiina bawngpui sem tak zingah hian 20 chu sawrlai an ni a; a dangte pawh hi reilotea no nei tur, a rai lai deuh vek an ni.
Vety Minister Pu C. Ngunlianchunga hian Thingdawl-a Vety Farm leh Kolasib-a bawnghnute sawngbawlna hmunte a tlawh bawk a. Department hmalakna hrang hrangte chu chhenfakawm zawka kalpui a tul thu sawiin, "Hmun hrang hrangah department-in ram zau tak tak leh hmunhma tha tak tak kan nei a, ranvulhna lamah department hi demonstration ti tur kan ni tawh lova, production kan tih a hun tawh a ni. Chutiang tur chuan hnathawktu, a te ber atanga a lian ber te hian ngaihtuahna kan sen a, tha thara hna kan thawh a, ruahmanna kan siam a tul tak meuh a ni" a ti.
Pu C. Ngunlianchunga hi Dr. Daniel Chianghnuna, Jt. Director te, Dr. C. Lalrintluanga, DVO, Kolasib leh Pu Robert Thangmawia, DIPRO, Kolasib leh chanchinbumiten an tawiawm a ni.
