Vawiin chawhnu dar 3:00 khan Serchhip DC’s Conference Hall-ah kumin a Serchhip-a Faina Hapta hman chhunga fai inelna a tithate hnena lawmman semna hun hman a ni a. He hun hi District Bawrhsap, Pi Juhi Mukherjee, IAS chuan khuallian niin a hmanpui a ni.

He hunah hian District Bawrhsap chuan khawtlang hruaitute leh mipui thahnemngaihna avang liau liauin Faina Hapta hlawhtling takin kan hmang thei ani tiin lawmthu a sawi a, vantlang huap mai bakah mimal leh chhungkaw tin ten faina kawnga hma an lakna chi hrang hrang a hmuh avanga lawmna nasa tak a neih thu a sawi a ni. Faina hi mihring hriselna atan pawh a pawimawh hle ani tiin kan ei leh in chungchangahte fimkhur lehzual a that zia a sawi a, vaihlo zuk leh hmuam khap ani chunga khawlaia meizial bawm leh kuhva funna te, tiranga kawr te hmuh tur a la tam thin chu hriselna atan a pawi bakah khawlai tihnawktu lian tak ani a ti a, heng thil hotr ni a kan ngaih te hi kan hmel tilang ti ani tih sawiin fimkur lehzual turin mipuite a chah a ni.

Bawrhsap hian Mizoram chu ram nuam leh mawi tak “Postcard” ang mai a ni a ti a, khawilai hmun pawh hi a thla la ila a nalh em em vek zel mai a, heihi mipuite pawh hian kan hmuh thiam a pawimawh a, a hmel tibaltu nilo tura kan inzirtir thar a ngai hle a ni a ti bawk. Faina Hapta zo tawh mahse kan thinlungah Faina Hapta hmang kumtluan ang u a ti a, “Clean Serchhip” ti a kan infuih thinna pawh “Cleaner Serchhip”ti a thlaka infuihthar leh sauh sauh turin mipuite leh khawtlang hruaitute a sawm a ni.

Pu S.T.Lalhmingmawia, Sanitation Officer kaihhruai he hunah hian kumina Faina Hapta hman chhunga inelna chi hrang hrang siama lawmman dawng tura thlanchhuah te hnenah khuallian Pi Juhi Mukherjee, IAS chuan lawmman hi a hlan a, Lawmman dawngtute chu :

Veng (Branch YMA Area) Fai : Pakhatna - Serchhip P&E Veng Branch YMA (Citation + Rs. 5,000/-) Pahnihna - Serchhip IOC Veng Branch YMA (Citation + Rs. 3,000/-) Pathumna - Serchhip Chanmari Veng Branch YMA (Citation + Rs. 2,000/-)

Zirna In Fai : Pakhatna - Govt. LM Middle School Serchhip. (Citation + Rs. 5,000/-) Pahnihna - Govt. Primary School -I, Chhiahtlang (Citation + Rs. 3,000/-) Pathumna - Govt. Chanmari Primary School, Serchhip (Citation + Rs. 2,000/-)

Serchhip khawpui huamchhunga Village Council Area fai ber lawmman Chhiahtlang Village Council hnenah hlan a ni a, lawmpuina thuziak “ Citation” leh tangkafai Rs. 5000/- an dawng a ni.

Vawiina Faina Hapta pual lawmman sem inkhawmah hian, Serchhip khawpui huamchhunga Village Council hrang hrang aiawhte “Extempore Speech” hmangin an in el a, Pakhatna chu Serchhip-I VCP Pu Zairemmawia niin, Pahnihna chu Chhiatlang VC Member Pu Lalremruata Hnamte a ni a, Pathumna chu Serchhip-IV VC Secretary Pu H.Lalbiakhlua a ni.

Serchhip District ah hian kum 2003 October ni 2, khan a hmasa ber atan Serchhip Town hall-ah Faina Hapta hi hman tan a ni a, kumin hi vawi 12 Faina hapta an hmanna a ni.

Vawiin Faina Hapta puala lawmman sem inkhawmah hian Serchhip khawpui chhunga sorkar Department Officer, tlawmngai pawl hruaitu leh Zirna In hrang hranga zirtirtu leh zirlaite an tel tha hle a ni.

Serchhip District a North Vanlaiphai Sub-Division leh Thenzawl Sub-Divisionah te bialtu SDO(Civil) kaihruaina a Faina Hapta pual inkhawm hi neih ani bawk.