1324/2024-2025

Aizawl, the 26th July, 2024: Animal Husbandry & Veterinary (AH&Vety.) Minister Pu C. Lalsawivunga chuan vawiin chawhma dar 10:00 khan Vety. Polyclinic Hospital Conference Hall, Khatla-ah Veterinary Diploma Holder Association (VDA) General Conference vawi 26-na khuallian niin a hmanpui. He hunah hian Dr. C.Lalrintluanga, Director, AH&Vety. Department chu khualzahawm a ni.

Khuallian Pu C. Lalsawivunga chuan Mizoram hmun hrang hrang atanga kalkhawm VDA member, ram tana theihtawp chhuaha thahnemngai taka thawk thinte chu khawmpui chibai bukin, Department hmasawn tum leh hmasawn duh hruaitu nei AH& Vety. Department-in hmasawn turin hma lam a pen mek zel a, hemi kawngah hian kan mawhphurhna theuhte tha taka kan hlenchhuah a ngai a ni, a ti a. VFA te chu field assistant, tunhma atang tawha kuthnathawktute nena inthlunzawm leh inngheng tlat an nih avangin he inlaichinna hi chhawmnun zel a tul a ni, a ti a. State puitlinga hlankai kan nih atanga kum 38 liam hnu pawha sa, artui leh bawnghnutea intodelh tura hmalak a ni chunga vawiin thlenga kan la intodelh lo fo chu ngaihtuah chian a tul thu sawiin, Field Assistant-te chu hemi kawnga hmalatu pawimawh tak pakhat an nih avangin ngaihtuahna thar pua intodelh tura tanlakpuiah a sawm a ni.

AH & Vety. Minister chuan ASF hrileng avangin Mizoramah vawk vulhtute'n harsatnate nasa tak an tawh mek thu tarlangin, AH& Vety. Department thawktute lakah mipuite'n beiseina sang tak an nei a, ran damlo enkawl kawngah Department hnuaia thawktute'n theihtawp kan chhuah tlan zel a ngai a, min mamawhtute tana biak nuam leh dawr nuam, mamawh huna che chhuak thei tura kan inpeih reng a ngai a ni, a ti a. AH & Vety Department chu kuthnathawktute tana ding leh thian tha tak a nih angin kan mite harsatna hriatpuia tanpui turin min mamawh phawt chuan ran vulhtute panchilh kan inhuam reng tur a ni, a ti a. Sa, artui leh bawnghnutea intodelh turin ran chawa intodelh hmasak a pawimawh thu leh hemi kawngah hian sawrkarin theihtawp chhuaha hma a lak chhoh mek thu a sawi a. VDA member-te chu mipui leh sawrkar laka an mawhphurhnate hlen chhuah tum zel turin a chah a, ram leh hnam hmasawn nana theihtawp chhuahpuiah a sawm nghal bawk.

Khualzahawm Dr. C.Lalrintluanga, Director, A.H&Vety. Department chuan VDA te post chelh theih hrang hrangah indaihlohna nasa tak awm bawk mah se, indaihlohna lang lo khawpa phak tawka thahnemngai taka an thawk thin leh a hlawhtlinna hmuh a ni thin chu fakawm a tih thu a sawi a. Khawvel hmasawn zelah tih dan changkang zawk leh thil thar a chhuah ve zel avangin VDA member-te chu tunhma tih dante ang ngawta kal a rem loh chang pawha insiamrem thiam turin a fuih a. Intuaithar zel tur leh Department hmalaknate ngaihvena hriat zel tum turin a chah a. Department hmasawn nana AH &Vety. Minister thahnemngaihna fakawm tiin, thawktu indaihlohna phuhruk a nih theih nana hmalaknate a tarlang bawk.

He hun hi VDA President Pu Kapthuama Renthlei chuan kaihruaiin Pu Zosangzuala'n hunserh a hmang a. Pu C.Thasiama, Gen. Secretary, VDA in kalkhawmte lawmna thu sawiin MVSA President Dr. Robert Rualthankhuma, VDA Adviser ni bawk hnen atangin thusawi ngaihthlak a ni a. Pu H.Lalbiakzuala, Fin. Secretary, VDA in lawmthu sawiin hun hman thawhkhatna a khar a. Chawhnu dar 1:00 ah VDA Vice President Pu T. Zoramsiama kaihhruaiin rorel inkhawm leh pawl member boralte sunna hun hman a ni a. Hemi hnu hian kum 2024-2026 chhunga VDA Gen. Hqrs. hruaitu turte an thlang nghal bawk.

Veterinary Diploma Holder Association (VDA) hi May ni 22, 1981 ah din niin tun dinhmunah member 129 an awm mek a ni.