1325/2024-2025

2024 Vawkhniahzawn thla ni 26: Vawiin khan Lunglei DC Conference Hall-ah Additional Deputy Commissioner (G) Pu James Miahlung hovin sawrkar laipuia Animal Husbandry & Dairying Department hnuaia Expert Committee-in ui kawlh leh mihring nunna tiderthawng thei nia an tar lante Lunglei District chhunga lak luh, inthlah puntir, vulh leh hralh khuahkhirhna kawnga hma lak dan tur sawi ho a ni.

He hunah hian Lunglei Municipal Council (LMC), Police, AH&Vety, I&PR leh Local Council Association ai awhte leh Lungleia ran enkawlna dawr/clinic neitute an tel a. Chairman Pu James Miahlung chuan India ram hmun hrang hrangah leh Lunglei khawpui chhungah ngei pawh ui seh vanga mihring tuarna a thleng fo tih sawiin, hei vang hian India sawrkar laipuia Animal Husbandry & Dairying Department hnuaia Expert Committee-in ui kawlh leh mihring nunna tiderthawng thei nia an hriat ui chi (breed) ṭhenkhat leh a thlah pawlh (crossbreed)-te ram chhunga lak luh, inthlah puntir, vulh leh hralh khap turin rawtna a siam tih a tar lang a; chumi bawhzui dan tur chu ngaihtuah turin ṭhut khawm chu buatsaih a nih thu a sawi.

He hunah hian Lunglei khawpui chhung bika ran khuahkhirhna chungchang chu LMC-in inkaihhruaina fel tak a neih hunah an kenkawh tur a la ni dawn tih tar lan niin, chumi hmaa hma lo lak lailawk dan tur ngaihtuah a ṭul thu tar lan a ni a. AH&Vety department ai awh leh pet care neitute hnen aṭangin Lunglei khawpui chhunga ui kawlh chi vulh leh inthlah puntir a nih dan tlangpui ngaihthlak niin, sawrkar laipui thuchhuak ṭha taka kenkawh a nih theih dan tur leh ui seh vanga mihring leh ran tuarna thleng thei venna tura ui khuahkhirh kawnga hma lak dan tur rawtna hrang hrangte sawi ho chhunzawm a ni.

Meeting chuan sawrkar laipui AH&D Department hnuaia Expert Committee-in ui kawlh leh vulh atana him lo nia an tar lante - Pitbull Terrier, Dogo Argentino, Rottweiler, Wolf dogs, Tosa Inu, American Staffordshire Terrier, Fila Bradileiro, American Bulldog, Boerboel, Kangal, Central Asian Shepherd Dog (ovcharka), Caucasian Shepherd Dog (ovcharka), South Russian Shepherd Dog (ovcharka), Tornjak, Sarplaninac, Japanese Tosa and Akita, Mastiffs (boerbulls), Terriers, Rhodesian Ridgeback, Canario, Akbash dog, Moscow Guard dog, Cane corso leh Ban Dog (Bandog) ang chite Lunglei District chhungah lak luh, inthlah puntir, vulh leh hralh a nih loh nan District Magistrate hminga khapna thupek chhuah ni se, tiin a rel a. Magistrate, Police leh Local Council te nen a huhovin ui khuahkhirhna zawm a nih leh nih loh enfiah turin thawh chhuah ni se tih niin, LMC lam pawhin ṭul leh ṭha an tih anga an lo bawhzui theih nan ngenna lehkha pek ni se, tih a ni bawk.