Vawiin chawhma dar 11:00 khan AH & Vety Sector Serchhip chuan NLUP-NEDP Cenvergence hnuaia a thawhkhatna atan chhungkaw 54 te hnenah tanpuina Rs. 21,17,620 an sem.

He huna khuallian, Pi Sangchhin Chinzah, District Bawrhsap chuan thu sawiin Mizote hi kan vannei hle a, sawrkar atangin tanpuina chi hrang hrang kan dawng mawlh mawlh mai ani. Mahse tanpuina kan dawn nasat tawh dan ngaihtuahin hmasawnna erawh kan nei lo hle thung si, a ti. Vawiina sawrkar atanga tanpuina kan dawn tur hi kan tuina zawng tak, eizawnna atana kan thlan a nih angin taima tak leh rinawm taka thawk tur leh hlawhtlinna chang ngei tura fuihin, ram tha, boruak tha kan nei a, kan ramah hian mi taima tan chaw a nghei theih loh a ni, a ti a. Pek ringawt nghak tan hlawhtlinna chhar tur a awm lova, rilru paukhauh tak pu chunga taima taka hna thawk turin kalkhawmte a chah a, tanpuina sum, bank account-a an dah sakna lehkha a hlan nghal a ni.

Dr. Lalmakthanga, Chief Veterinary Officer chuan tanpuina sem dan tur leh hmalak dan tura ruahmanna siamte sawifiahin NLUP-NEDP hnuaiah chuan tanpuina pawisa hi tum hnihah pek zawh vek tum a ni a, a tum khatna an pek atanga thla 1 ral hnuah an hma laknate endik sak vek an ni ang a, pek chhunzawm tlakte chauh pek chhunzawm an ni ang, a ti.

Vawiina tanpuina an pekte leh an hmalak dan tur chu hetiang hi a ni; Bawnglian vulh thlangtu mi 5 hnenah Bawng in sakna atan Rs. 20,000 theuh, Vawk vulh thlangtu mi 34 hnenah Vawk in sakna, bungbel leh vawk chaw hmun siamna atan Rs. 36,000 theuh, Ar vulh thlangtu mi 13 hnenah Ar in sakna, Ar note, Ar chaw leh tul dang leina atan Rs. 52,740 theuh, Tlangram Bawng vulh thlangtu mi 1 hnenah Bawng 2 leina tur leh a in sakna tur atan Rs. 55,000 leh Sial vulh thlangtu mi 1 hnenah Se nufa leina tur leh tul dang atana hman tur Rs. 53,000 an pe a, vawiina tanpuina sum an pek zawng zawng hi Rs. 21,17,620 niin, heng bakah hian NLUP 3^rd & 4^th Phase a rokhawlhna avanga dawng ve ta lo chhungkaw 3 te hnenah Rs. 76,000 theuh an hlan bawk a ni.

He hun hi Dr. Lalnghinglova, District AH & Vety Officer Serchhip chuan a kaihruai a, Sawrkar flagship programme pawimawh tak NLUP tanpuina chu Serchhip District chhunga chhungkaw 1761 hnenah an Department kaltlanga pek chhuah a nih tawh thu leh NLUP hnuaia mi hlawhtlingte zarah sawrkarin NEDP duang chhuak lehin, NLUP leh NEDP thlunzawm hmang hian, AH & Vety Sector Serchhip chuan mi 55 te hnenah tanpuina pek chhuah an tuma, mi pakhatin a phat tak avangin mi 54 te hnenah hian tanpuina pek a nih tak thu a sawi. Dr. Biaklianzuali, Veterinary Officer chuan lawmthu sawiin he hun hi a khar a, chawhnu lamah Training Programme hlawkthlak tak hman chhunzawm a ni bawk a ni.