Vawiin chawhma dar 11:00 khan Saikuti Hall, Lunglei-ah MZP Hqrs Lunglei leh Social Welfare Department tangkawp buatsaihin rilru hriselna leh damdawi hmansual chungchang sawihona leh inhrilhhriatna hun ‘Awareness on Mental Health and Drug Abuse’ programme hman a ni. Social Welfare Minister Pu PC Lalthanliana chuan khuallian niin a hmanpui. He hunah hian sawrkar department hotute bakah Lunglei khawpui chhunga zirlaite leh zirtirtute thanhnem tak an kalkhawm a ni.  

Pu PC Lalthanliana chuan vawiin programme pawimawh takah thalai rual thahnem tak an kalkhawm thei chu lawmawm a tih thu sawiin Zofa thalaite’n ruihhlo an duhlo takzet tih a lantir a ni, a ti a.  Ruihhlo chu kan khawtlang tan hmelma lian ber a ni chho mek a ni tiin Social Welfare Minister chuan ruihhlo do kawngah sawrkarin chak tak leh thahnem ngai takin hma la zelin ruihhlo zuartu, tawlhtute leh hmangsualte hremna tur Dan khauh zawk Mizoram Drug (Controlled Substances) Act chu kum 2016-a siam a nih bakah damdawi hmansual a nih dan leh ruihhlo ngai te dinhmun zirchianna “The Baseline Survey on the Extent & Pattern of Drug Use in Mizoram” chu Social Welfare Department (SWD)-in a buatsaih a ni, a ti a. Ram hmasawn tur chuan naktuka kan ram hruaitu ni mai tur thalaite chu ruihhlo laka an fihlim a, an zirlai an ngaih pawimawh a tul a ni tiin zirlai kalkhawmte chu ram leh hnam hmumhalh tura rilru siam turin Minister chuan a fuih a. Vawiin programme-a resource person-te thusawi te ngun taka ngaithla a, a taka nunpuia, anmahni khua leh veng theuha ruihhlo do kawnga tan la thin turin Minister chuan zirlaite chu a chah bawk. 

Vawiin programme hi Pu Lalrammuanawma, Vice President, MZP Hqrs Lunglei in a kaihruai a.  Pi Camilia Lalhruaitluangi, Counsellr, BCM Christian Counselling leh Pi Vanlahruaii, Facilitator, Mizoram Social Defence & Rehabilitation Board-te chu Resource Person niiin zirlai kalkhawmte chu rilru hriselna leh damdawi hmansual chungchang an zirtir. 

 

 

Attachment

  • Loading attachment...