Champhai AH & Vety Department chuan Champhai khawpui chhung ranvulh kawnga hma la tha leh mi hlawhtlingte chawimawina Farmers’ Award 2016 chu nimin (31.10.2016) khan Government Champhai College Seminar Hall-ah a nei a. Ranvulh chungchanga College Level Essay and Slogan Writing intihsiakna lawmman sem nghal a ni bawk. Farmers’ Award hi ran ei tura mipuite kan intodelh theihna tura mipuite cho chhuahna leh, helam kawnga rilru kaiharhtu anih theih nan AH & Vety Department chuan mi hlawhtlingte chawimawi leh phochhuah nan a ruahman a ni.

He Farmers’ Award hlanna hun hi Veterinary Officer Dr. TC. Lalthanzauva’n kaihruaiin, Veterinary Officer Dr. Lalrintluanga chuan Power Point Presentation hmangin Sa ei tur kan intodelh theih nan a Mizoram State AH & Vety Department in Mizoram chhung hmun hrang hrang -  Thenzawl-a ran chaw sawngbawlna hmunte,  Tanhril-a Ar vulhna leh a inthlahpunna hmun a hmalak dan te,  Selesih-a Ran inthlah punna tura ran chi lak dan te a sawifiah a ni.

MJA Champhai District President Pu C. Lalhnunpuia chuan Farmers’ Award semna hun hmangin, Mizoram a intodelh nan AH & Vety Department hmalakna te chu mipuiin kan tawiawm a tul thu leh, ranvulh leh enkawl kawngah nasa zawka tan kan lak a tul thu a sawi tel bawk a. Ram mipui tla khawp thar chhuak tura ran vulh tura ke pen chhuah a tul thu a ni, a ti.

Govenment Champhai College Principal Pu Lalnunmawia chuan Essay leh Slogan Writing Competition a titha zirlai 3 te leh Slogan Writing Competition a titha bik zirlai 3 te hnenah lawmman a sem bawk a. Thu sawiin, lehkhathiamlo kuthnathawk aiin lehkhathiam kuthnathawkin rah tha a thlen thin thu leh, zirlaite tan sorkar chauh nilo thawh tur hlawkthlak tak tak a awm thu a sawi a. Taimakna leh thiamna hman tangkai nachang hriat chuan kuthnathawktu hlawhtling leh hausa nih cuh a harsa hauhlo a ni, a ti a. Mizoramin intodelhna kawng a zawhnaah ranvulh lama mithiamte chu hma thar la turin a chah bawk.

Farmers’ Award hi lawmman pakhatna atanga pathumna thleng (1st prize - Rs 5000 + Trophy; 2nd prize - Rs 3000 + Trophy; 3rd prize - Rs 2000 + Trophy) awm in, Most Promising Farmer Award leh mi 5 hnenah consolation prize Rs 500 heuh pek an ni bawk. Essay lawmman hian pawisafai (Rs. 3000, Rs. 2000, Rs. 1500) leh trophy a keng theuhva, Slogan inphuahsiak a titha pathum te hi lawmman pawisafai (Rs. 500, Rs. 300, Rs. 200) a keng bawk.