School Education Minister Pu. H. Rohluna chuan vawiin chawhma dar 10 khan Mizo Students’ Union (MSU) General Conference vawi 15-na, Aizawl Vanapa Hall-ah neihah khuallian niin a hmanpui. He conference, ni hnih awh turah hian Pu Joseph Lalhimpuia, Parliamentary Secretary chu  khualzahawm a ni. 

Minister Pu H. Rohluna chuan zirlaite hi ram tan chi (seeds) pawimawh tak an nih avangin Pre-School atanga University thlengin chi tha kan tuh theih nan theihtawp kan chhuah thin a ni, a ti a. Mizo Student’s Union chu Zirlaite kawng dik kawhhmuhtu, ram leh hnam hruaitu turte kaihruaitu an nih thu sawiin an hmalakna chu fakawm a tih thu a sawi baw. Zirna leh “human resource” tihhmasawn nana sorkar hmalakna hranf hrangte Minister chuan tarlangin,  Central Service leh All India Service-ah Mizoram atangin thalai tam zawk an tlin theih nan coaching centre-te buatsaih a nih thu leh chungte chu hman tangkai anih theih nan zirlaite a sawm a. Mathematics leh Science lamah rampum huap tehna Mizoram chuan a phak loh chang a awm fo va, hei vang hian Mathematics leh Science Subject-a hma kan sawn theih nan Mathematics leh Science Subject teacher lakna tur Recruitment Rules siam thar a ni, tiin Minister chuan Middle School-ah Science leh Mathematics zirtirtu tur Recruitment Rules thar ang hian engemawzat lak a nih tawh thu leh, High School-ah pawh Science leh Mathematics zirtirtu 111 la tura hma lak mek a nih thu a sawi a. Centrally Sponsored Scheme(CSS) Hindi Teacher-te chungchang sawiin, kum 2017 February thlaa an hna thawh hun tawp tur chu a pawhsei dan ngaihtuah leh an hlawh chungchang pawh sorkar laipuiah thlen a nih tawh thu a sawi bawk. 

Khualzahawm Pu Joseph Lalhimpuia, Parliamentary Secretary pawhin thu sawiin, MSU chu sorkar hmalaknaah leh zirchiannaah finchhuahtu, thawhpuitu tangkai tak an nih thu a sawi a. Tunlai khawvel hi intihsiakna khawvel, a thei apiang leh a fit apiangte dinchhuahna a nih tawh avangin zirlaite chu awm mai mai lo va, rim tak leh taima taka theihtawp chhuah a, hlawhtlinna hmu ngei turin a fuih a. Kan pi leh pute hunlaia ‘zonunmawi’ chhawm nung zel turin leh Mizo hnam leh Mizoram tan an theihnate hlan turin zirlaite a chah a ni. 

Vawiin hun ah hian Pu P.C. Lalrinhlua, President, MSU chuan thu sawi bawk in, Pu Lalremruata Chhangte, General Secretary chuan report a pe a.  Pu R.thangmawia (L) ZORO hruaitu hlun chhungte hnenah chawimawina thuziak hlan a ni. 

MSU General Conference-ah hian Aizawl khawpui chhunga College zirlai thahnem tak leh Mizoram hmun hrang hrang atangin palai 600 chuang an tel a. Naktuk (02.11.2016) hian kum 2016-2018 chhunga MSU hruaitu tur thlanna neih a ni ang.