Animal Husbandry & Veterinary Department, Kolasib District chuan Kolasib a NLUP 3^rd & 4^th  Phase hnuaia vawk vulh thlangtu mi 50 hnenah vawk note 150 vawiin khan an sem.

Vawk note sem chhuahna hi District AH & Vety Office tual zawlah neih a ni a. He hunah hian Dr. C.Lalrintluanga, DVO chuan vawk note dawngtute chu a dawn mai duhtawk lova eizawnna tling ngei tura thahnemngai taka enkawl turin a chah a. NLUP chungchanga zawhna leh chhanna hun tawite hman a ni a. Village Level NLUP Committee(VLNC) te pawh vawk note semnaah hian an tel a  ni.

Vawk note hi 26^th April, 2017 khan Lungdai, Serkhan leh Nisapui ah te beneficiary 23 hnenah vawk note 69 sem chhuah a lo ni tawh a. Vawk note sem hna hi district pumah chhunzawm zel tur a ni a. Vawiin vek hian Vairengte-ah pawh sem a ni. AH & Vety Department chuan hun reilote chhungin district chhunga NLUP hnuaia vawk vulh thlangtu beneficiary 456 ten tual thar vawk note an dawn vek theih nan ruahmanna siam a ni an ti. Vawk note hi benificiary pakhatah pathum zela sem a ni a. Heng vawk note sem te hi tualchhung thar vek niin, endik vek hnuah a tha chauh pek chhuah an ni.