904/2026-2027

Aizawl dated 9th June 2026: A-HELP (Accredited Agent for Health and Extension of Livestock Production), ran hrisel zawk a enkawl thei tura hmeichhiate buatsaihna Traning tum 10-na chu Animal Husbandry & Veterinary Department, Mizoram State Rural Livelihood Mission (MzSRLM) leh State Institute of Rural Development & Panchayati Raj tangkawp chuan a buatsaih a. He traning hi ni 17 awh tur niin, SIRD & PR, Durtlang ah khaw hrang hrang atanga thlanchhuah hmeichhia mi 25-te chu ran hrisel zawk neih theihna atan mithiam ten zirtirna an pe dawn a ni. A-HELP Training tum 10-na hawnna hun hi Dr. Lalramngheta, Deputy Director, AH&Vety chuan kaihruaiin Dr. Lalrotluanga Sailo, Director chuan Training hawnna hun a hmang a . Dr. C. Khawlthangmawia, Jt. Director chuan lawmthu sawina hun a hmang bawk a ni.

Dr. Lalrotluanga, Director, AH & Vety Department chuan mizo hmeichhiate chu thiamna leh theihna tangkai tak nen thuam an nih chuan, chhungkaw tihmasawn tura taima leh tumruh an nih thu a sawi a. Ran enkawlna kawngah pawh thiamna tangkai leh hmanrua an mamawh angte pek an nih chuan, chhungkua leh khawtlanga sa hrisel intodelhna kawngah hmanraw tangkai tak an nih theih thu a sawi a. Chutiang hmasawnna thlentu ni tur chuan AH&Vety, MzSRLM leh SIRD & PR tangkawp buatsaih, A-HELP Training Programme chu tangkai taka hmang turin kalkhawmte a chah a ni.

Training hawnna-ah hian Dr. Lalhruaitluangi Sailo, Sr. Core Faculty, SIRD&PR, Training Manager chuan Training chhunga hriattur pawimawh a sawi a, He training-ah hian Serchhip, E. Lungdar, Zawlnuam, Tlangnuam, Khawbung, Lungsen, Tlabung, Bunghmun RD Block-te atanga MzSRLM hnuaia Livestock Community Resource Persons thlan bik mi 25 te training pek an ni ang, AH & Vety Dept leh MzSRLM atang a Master Trainers leh External Facilitator-ten zirtirna hi an pe dawn a ni. Ran enkawlna atana an hman tangkai tur – A-Help Kit, training-a kalte hi pek vek an ni.