903/2026-2027

"Hun tiam ral hmaa quality tha taka hna thawk zo thei Evergreen Construction & Consultancy chungah kan lawm a. Hetiang Firm hi chawimawi ang u" _ Chief Minister.

Serchhip, the 9th June 2026: Chief Minister Pu Lalduhoma chuan vawiin khan a bial Serchhip a tlawh a, Artificial Limbs Manufacturing Corporation of India (ALIMCO) ten a mamawhtu mi 211 hnena an nitin hmanraw mamawh 1427 an semna a telpui a, Deputy Commissioner leh NIC te tangkawpin an siam District Plan & Project Monitoring System thar a hawng a, Bawngchawm Paragliding Take-Off tlang panna kawngpui tihzauh leh PCC thar te, Zawlpui leh a chhehvel zau inkalpawhna kawngpui tihzau leh PCC tharte a hawng bawk a. Tlai lamah Serchhip bial MLA Cup Final Programme a hmanpui bawk a ni.

A hmasa berah Chief Minister hian Serchhip DC Conference Hall-ah Serchhip DC leh ALIMCO tangkawp ten an kalpui, pianphunga rualbanlo te, ramtuileilo leh kum upa, an chetvelna atana ALIMCO hmanraw siam mamawhtu mi 211 te hnena bungraw hlanna a telpui a. Hmanraw thar dawngtute lawmpuiin, heng an mamawh thilte an dawn theih nana hma latu ALIMCO leh DC chungah lawmthu a sawi.

Chief Minister chuan, kan duhthlanna vang ni lovin, kan pianpui tisa lama kim lohna emaw harsatna kan nei thei a, fuke kim biaia kan pian hnu pawhin eng emaw vanduaina avangin kan taksaah kim lo leh fel lo a awm thei bawk a. Tin, kan kum a lo tam tak avangin hmanrua eng emaw nena kan nun a tul chang a awm thei bawk a. Chutiang kara kan awm chuan kan harsatna min sutkiansak thei hmanrua kha an lo pawimawh hle thin. Chutiang mite mamawh hmanraw siamtu tur chu sorkar laipui chuan kum 1972 khan ALIMCO hi a din a, an hmanraw mamawh a siamsak a. Mizoramah pawh office rawn hawngin tha takin hma an la a. Vawiinah Serchhip district khaw hrang hranga miten an zar kan zo ta a ni. An thil semte hi a mamawhtute tan a hlut em avangin Mizoram pumpui tuam chhuakin hma la thei se ka duh hle a. DC zawng zawng ten lo ngaihven se a thain ka hria, a ti.

Vawiin hian Serchhip district chhunga Disabled person mi 28 leh kum lama upa, mi 183, an vaiin mi 211 hnenah hmanraw chi hrang hrang 1,427 zet an sem chhuak a. An hmanraw pek chhuah hlut zawng hi Rs. 19.25 Lakh hu a ni.

He mi zawh hian Serchhip DC Meeting Hall-ah Deputy Commissioner leh NIC ten an siam Serchhip District Plan & Project Monitoring System tlangzarhna a nei leh a. He system hi State Collaboration Initiatives hnuaia DARPC funded project a ni.

He hunah hian Chief Minister chuan, nikum June ni 18 khan Serchhip DC leh NIC-te tangkawpin an siam, “Vantlang Viltu” (Citizen’s Eye) kan lo hawng tawh a. Vawiinah District Plan & Project Monitoring System kan han tlangzarh leh ta a. Hetiang thil tha tak tak ngaihtuah chhuaktu kan DC leh a thawhpuite chungah lawmthu ka sawi a ni.

He system thar hian Serchhip district hmasawnna tur in thawhhona a tichak dawn a, data tharlam ber ber kan nei reng thei dawn a. Kan tangkaipui hle ang. Monitoring System tiin a hming kan han vuah a, Cooperative monitoring/Collaborative monitoring lam kha a kawk deuh berin ka ring a. Sorkar hian Convergence kan uar a, kan rawn tihbelh chho zel dawn a. DC kaihhruaina hnuaiah inhretawn vekin kal ula a, DC pawh hi thunei takin awm se kan duh a. An hmuh phak loh emaw an hriat loha Department thenkhatten hna in lo thawhte hi tha kan ti tehchiam lo. Inhriatsak tawn zela hmalakna hian Project inthuah tur a titlem a, sum leh pai, hun leh tha kan save zawk a ni, a ti.

Digital Service hian sorkar hnathawkte leh mipuite hi awlsamna min pe ve ve a. Ka mimal duhdanah phei chuan, Mizoram hi Digital State-a siam ka duh a. Mipui kan la tlem a, ziak leh chhiar thiam kan tam a, digital state nih hi chuti taka harsa niin ka ring lo. Department zawng zawng hian mipuiten an va dawr theihna chi, an Business theuh kha Digital Platform siam vek se, digital state kan ni titih der a ni mai. Private Firm rawih man a lo to a nih pawhin, sorkar anga kan thawhpui theih; ICT te, Mizoram e-Governance Society te leh NIC te kan nei a. Kan vei chuan kan tih theih vek ka ring a ni, a ti.

DC Office lama hun a hman zawhah Chief Minister hian Bawngchawm tlanga Paragliding thlawhchhuahna hmun (Take off Point) a pan a. He hmun panna kawngpui thar leh Mat kam Zawlpui leh a chhehvel zau hrang hrangte panna kawngpui siam thar hawnna hun a hmang zui a ni.

Thusawiin Chief Minister chuan, Paragliding Take off Hill panna kawngpui te, a Landing panna kawngpui, Zawlpui leh a chhehvel zau hrang hrang link road ni nghal bawk te, kan lo hawng thei ta a. Serchhip leh Mizoram tana hmasawnna lawmawm tak, lungte pakhata Sava pahnih vawmthlakna a ni.

Kan sawi tawh thin angin he lai hmun hi India ram mai ni lovin, khawvel huapa Paragliding Sports neihna hmunhma tha a tling a. Mizoram tan chuan - Pathian thilthlawnpek hmun a ni. A hlutna ang taka kan hman thiam hian min petu Pathian pawh a lawmin a rinawm.

Kan contractor, Evergreen Construction & Consultancy ten a zawh hun tura bituk thlen hma kum khat vel zet a la awmah, hun tiam zatveah an thawk zo thei hi, a lawmawm zual hle. Quality tha taka hun tiam zatvea hna thawk zo, PWD ten Letter of Appreciation an hlan awm chhun an ni hial mai thei a. Hetiang contractor hian chawimawi an phu a ni, a ti a. Hetianga a panna kawngpuite a lo that takah chuan Mizoramin International Sports Event kan huaihawt theih - Paragliding Sports hi inthlahrung lo takin kan huaihawt fo thei tawh dawn a ni.

Heng kawngte hi Paragliding ringawt hisapa siam kan ni lo va. A take-off tlang, Bawngchawm tlangah hian Bawngchawm Livestock Society ten ran an vulh a, han len khawthawnna tlaka hmunhma nuam a lo ni sa bawk a.

Zawlpui leh a chhehvel zau kawngte khu kan kuthnathawktute hmakhua ngaihtuahna vanga siam kan ni a. Kuthnathawktu chhungkaw tam takten an chhawr dawn a, kan ram economy tana thil tangkai a ni. Landing site khu chuan a zar a lo zo ve chauh zawk a ni, a ti.

Paragliding Take Off hmunhma panna kawng thui zawng hi 4.70 km niin, widening thui zawng hi 260 meter a ni. A kawng zau zawng (formation width) hi meter 5.50 a ni a, a kawng chhuat phah (pavement) zau zawng hi meter 3 a ni. A kawng chhuat phah (pavement) hi Granular Sub Base (GSB) 125 mm a chhah phah a nih hnuah Plain Cement Concrete (PCC) 100 mm M25 grade-a phah vek a ni a. Contractor Agreement Amount chu Rs. 3,45,63,310 a ni.

Mat kam zauhote inkalpawhna kawng thui zawng hi 11.20 km a ni a. A kawng zau zawng (formation width) hi meter 5.50 a ni a, a kawng chhuat phah (pavement) zau zawng hi meter 3 a zau a ni. A kawng chhuat phah (pavement) hi Granular Sub Base (GSB) 125mm a chhah phah a nih hnuah Plain Cement Concrete (PCC) 100mm M25 grade-a phah vek a ni.

Land improvement hi hmun hrang hrang – Zawlpui zau, Lumtui zau, Lau zau, Lathei zau, Zuangleng zau leh Chhiahtlang zau te an ni a, Land Improvement thawh zawng zawng zau zawng belhkhawm hi 83.03 hectare a ni a. Contractor Agreement Amount hi Rs. 9,63,30,359 a ni.

Heng hna pahnihte hi NABARD sum hmanga thawh niin contactor hi Evergreen Construction & Consultancy, Khatla, Aizawl an ni a. Hna hi a zawh hun tura bituk aia kum khat zeta hmaa a zawh avangin PWD Serchhip Division chuan Evergreen Construction & Consultancy neitu Pu J. Vanlalliana hnenah hian Letter of Appreciation an hlan a ni.

A hnuhnung berah Chief Minister hian Serchhip Sports Complex-a Serchhip MLA Cup 2026 kharna inkhawm a telpui leh a.

Thusawiin Pu Lalduhoma chuan, Football hi Mizo thalaite tana eizawn theihna remchang infiamna a ni a. Khawvel ngaihsanrawn Sports Discipline a niin tunah ngei pawh kan thalai tam takten eizawn nan an hmang mek a ni.

Kan ramah ruihhlo a hluar avangin ruihhlo laka kan inven theihna remchang tak chu Sport hi a ni a. Ruihhloa tlu lut lem lote tan pawh infiamna hi kan taksa leh rilru hriselna hnar ni. Infiamna hian kan inkarah inpawhna tha zawk min pe a, midangte nena thawhho dan min zirtir a. Hlawhtling tura kan rilru leh taksa hman kawp dan min zirtir a. Chak dan min zirtir a, chak loh dan pawh min zirtir tho va. Kawng tinrengin infiamna hian nun kawng tha min zirtir a ni.

Kan thalaite hian infiamna hi uar ila, talent nei thaten eizawnnan hmang se, chutianga ti thei lote pawhin kawng dangah sawtpui ila kan duh a. MLA Cup pawh hi infiamnain thil tha min pekte hre reng chunga buatsaih a ni, a ti a. MLA Cup-a tel VC team 23 te chungah lawmthu a sawi a ni.

Final-ah hian New Serchhip South VC leh Chanmari VC team te an intum a ni.