902/2026-2027

Lunglei, 2026 Nikir thla ni 9: Vawiin khan Lunglei District Bawrhsap Pi Navneet Mann hovin a hna thawh pindanah Mizoram sawrkar flagship programme, Mizoram Bana Kaih (Handholding) Scheme Phase–II hnuaia Lunglei District-a Chief Minister's Special Package ṭanpuina dawng tura thlan department pali hnuaia progress partner mi pariat hnenah an chhinchhiahna tar tur (placard) leh thuziak (certificate) hlan a ni.

Bawrhsap Pi Navneet Mann chuan progress partner-te lawmpuina leh duhsakna hlanin, Bana Kaih Scheme chu Mizoram sawrkar flagship scheme a nih angin department-te leh progress partner-te pawhin a tihhlawhtlin kawngah theih tawp chhuah a ṭul tih a sawi a. Bana Kaih hnuaiah progress partner-te chu ṭanpuina sum leh loan pek an nih bakah, thlai thar hralhna ngaihtuahsak leh a man dona (support price) pek niin, hmanrua leh thiamna hmanga department-te'n vil zui a, an bana an kaih ṭhin thu a sawi a. Ṭanpuina sum inpek chu a bul ṭanna chauh a nih thu sawiin, progress partner-te chu hlawhtling ngei tura theih tawp chhuah tur leh department-te nen inpawh taka thawk ho va, an thurawn leh fuihna ngaichang thiam turin a chah.

Lunglei Sub-Deputy Commissioner Pu Lalruatfela'n hun kaihruaiin, report tlangpui a tar lang a. Bawrhsap chuan placard leh certificate chu progress partner-te kutah hlanin, official-te chuan progress partner-te tana hriat tur pawimawh hrang hrang an hrilhfiah bawk.

Bana Kaih Phase–II hnuaiah hian Lunglei District-ah CM Special Package-ah progress partner thlan fel tawh pakua awmin, March thla khan Animal Husbandry & Veterinary (AH & Vety) Department hnuaia Ar Vulh (Poultry Farming)-a hma la tur Pu Lalnunmawia, Ṭawipui South hnenah ṭanpuina sum hi pek fel a lo ni tawh a. Vawiin khan mi dang pariat hnenah placard leh certificate hlan ve leh a ni.

Tun ṭuma CM Special Package dawng tur certificate hlante hi Commerce & Industries (C&I) Department hnuaiah mi pathum – R. Lalliantluanga, Chanmari-II, Lunglei (Puan Ṭhui); K. Malsawmtluangi, Ramthar, Lunglei (Beauty & Wellness Therapy) leh S. Zomuanpuii, Electric Veng, Lunglei (Chaw leh Ei Tur Sawngbawl) te; Sericulture Department hnuaiah mi pathum – Herily Lalngaihzuali, Ṭhangpui (Pangang Khawi); Vanlalhruaii, Ṭhangpui (Pangang Khawi) leh F. Ronghaka, Ṭawipui North-II (Pangang Khawi) te; AH & Vety Department hnuaiah mi pakhat – Lalrintluanga, Rangte (Vawk Vulh) leh Cooperation Department hnuaiah mi pakhat – J. Lalthlamuana, Electric Veng, Lunglei (Handicraft) te an ni.

Bana Kaih CM Special Package ṭanpuina hi ₹50,000/- niin, progress partner-te bank account-ah Direct Benefit Transfer (DBT)-a thun tura ruahman a ni a. Certificate inhlan fel hnuah hian bank kal tlangin inpek fel nghal a ni ang.