No.5809/2020-2021

Animal Husbandry & Veterinary Minister Dr. K. Beichhua chuan vawiin khan Veterinary Polyclinic Hospital, Khatla ami chu a tlawh a, hnathawktute hnathawh dan a enpui nghal.

Polytechnic Hospital Seminar Hall-a Department officer te nen an inkawmnaah Dr. Beichhua chuan COVID-19 hrileng karah Department official te hnathawh dan leh hmalakna te chu chhuanawm a tih thu sawiin, an thahnemngaihna leh thawhhona tha an neihte chu lawmawm a tih thu a sawi. Sa, bawnghnute leh artui-a Mizoram intodelh theih nan Official te chu tha thar nen, ngaihtuahna thar nen theihtawp chhuah chhunzawm zel turin a chah nghal bawk.

Minister Dr. Beichhua chuan COVID-19 hrileng karah sa ei chi lama Mizoram intodelh lo tih a chiang hle a, hei vang hian Mizoram mipuiten tun hma aia chak zawka tan kan lak a pawimawh a ni, a ti a, mite kuta innghat lovin keimahni ngeiin kan thawhchhuah a ngai a ni, a ti a. Minister chuan kum khat leh thla 10 vel an kal tawha AH&Vety Department hrang hrang hnathawh tawhte tarlangin, Veterinary Dispensary paruk (6) Mamit, Serchhip, Lawngtlai, Saitual, Khawzawl leh Hnahthial te chu Veterinary Hospital-a hlankai (upgrade) tawh a ni a ti a, Rural Animal Health Centre (RAH) 35 chu Dispensary a hlankai tawh a ni, a ti bawk. District pasarih (7), Lunglei, Siaha, Lawngtlai, Champhai, Kolasib, Serchhip leh Mamit ah te Veterinary Hospital building sak hna thawh mek a ni tih a tarlang bawk a, heng hospital te hi khawl tha taka thuam vek an tum thu leh reilote ah peihfel a beisei thu a sawi.

Dr. Beichhua chuan vawk chi sawngbawlna hmun leh a kah rai na hmun, Satellite Boar Semen Station te chu Focus Area, Champhai, Kolasib, Serchhip leh Mamit ah te a sak hna chak taka kalpui mek a ni tih a tarlang bawk.

National Animal Disease Control Programme (NADCP) chu Hmarchhak state zawng zawngah October Ni 5, 2020 atangin kalpui tan a ni bawk a, he programme in a tum ber chu Bawng, lawi leh sial te natna, Food & Mouth Disease chu kum 2025 ah khuahkhirh a, kum 2030 ah India ram atanga umbo tum a ni.

Minister hi Director Dr. Hmarkunga leh officer dangten an lo dawngsawng a ni.