No.5808/2020-2021

Mamit 6th October, 2020 : Vawiin khan DC Conference, Hall Mamit-ah Hands on Training and Distribution of Smart Classroom (K-Yan) Programme neih a ni a. Dr. Lalrozama, IAS District Bawrhsap chuan khuallian niin he hun hi a hmanpui.

Dr. Lalrozama chuan beisei taka an lo thlir Mamit District Middle School-te tana Smart Class kalpuina tur hmuh a ni ta chu lawmawm a tih thu a sawi a. Project-in a tum ang taka naupangte'n an zirlaiah phurna nei a, pawl sawn ringawt ni lova thiamna tak tak neia tunlai Technology hmanga khawpui zawka zirlaite um phak tura zirna pek niin khawvel ram changkang zawkte'n zirna an kalpui dan an hmuh phaka chhawpchhuahsak an ni tur chu zirlaite'n hmasawnna nasa zawk an neih a beisei thu a sawi. Zirtirtute pawh Smart Class zirlaite hnena kalpui tura intuaihriam tura chahin, a khawl hman dan mithiam zawk te'n zirtirna an pek chu uluk taka training turin a chah a. Tuna School 20 thlanchhuaha zirlaite'n tangkai leh hlawkpui taka an hmanna rah chuan School dang naupangte tana hmalak lehzelna turah awmze thui tak a neih dawn thu a sawi bawk. Education Department hotute leh Project hlawhtlinna tura thawktute zawng zawng chungah lawmthu a sawi bawk a ni.

He hun kaihruaitu Pu Beitlotha Nohro, SDC pawhin thusawiin REC Ltd. (Rural Electrification Corporation Limited) CSR Education Project kal zelah Education Project hnuaia zirnain hma a sawn zel theihna turin Smart Classroom (K-YAN) Project duan a ni a. He khawl 20 lei nan hian Rs 49 Lakhs ruahhman niin, K-YAN khawl hi audio-visual learning - aid a ni a, CBSE Learning module a chhawm tel bakah touchscreen a ni.

Pu Lalsailova, Addl.DPC, Mamit chuan lawmthu sawiin Mamit District chuan zirna lama hma kan sawn theihna tura hmasawnna hmel duhawm tak tak an hmuh chhoh zel thu a sawi a. District Bawrhsap-in hmathlir thui tak nei chunga hma a lakpuina-ah lawmthu a sawi bawk. Middle School thlanchhuah 20-a zirtirtute chu thahnem ngai taka training turin a chah nghal bawk a ni.

Chawhnu hunah hian Middle School 20 thlanchhuaha zirtirtute hnenah Pu Vanlalliana, RK Traders chuan zirtirna a pe nghal a ni.