No.5807/2020-2021

Kolasib 6th October 2020: Vawiin chawhma khan Extension Training Centre Conference Hall, SIRD & PR, Kolasibah Village Council hruaitu thlan tharte tan Village Council inkaihhruaina dan, thuneihna leh pisa enkawl dan chungchangah ni hnih awh training buatsaih a ni a. Dr. H.Lalthlangliana, Deputy Commissioner chuan training hawnna hun hi hmanpuiin Kolasib district chhung veng hrang hranga VC President, Secretary leh Treasurer-te an tel a ni.

Dr. H.Lalthlangliana chuan Village Council inkaihhruaina dan chu 1954-ami tawh, siamthat leh her rem hret hret a nichungin a kalphung erawh thlak danglam a tam loh thu a sawi a, “Inkaihhruaina dan tha tak kan neih avang hian Village Council tangkai tak kan neih phah a ni”, a ti. DC chuan Mizorama Village Council inkaihhruaina dan chu ram pawn atang pawh a fak a hlawh thin thu tarlangin “Heng dan leh thuneihnate hi tangkai taka hmang tur chuan kan hriatchian hle a ngai a ni,” a ti a, khawtlang a inkaihhruaina tha a awm theih nan training-na hun chu tangkai tak leh hmasawn tum a uluk tak a tel turin a chah bawk a ni.

Vawiin VC Training hawnna hun hi Pu. ZR Thafala, Principal, ETC (K), SIRD & PR in a kaihruai a, Pu. John Lalmuankima, Faculty (PA) in training kalpui dan tur tlangpui sawi zauna hun hmangin Pu. ST Lalhmingmawia, DLAO, Kolasibin Village Council hruaitute mawhphurna pawimawh zual thenkhat tarlanna hun a nei a. Pi. T. Lalchhanhimi, Faculty (CD) in lawmthu sawina hun a hmang a, Pu. Gaston Vanlalhriatpuia, BDO, Thingdawl, Pu. Nieng Thianlala, BDO, Bilkhawthlir leh Pu. Hmingthanzuala, DIPRO, Kolasib ten an telpui bawk a ni.

Extension Training Centre, SIRD & PR Kolasiba Village Council hruaitute tan a training buatsaihah hian Viallge Council Danpui 1953, Gram Sabha leh Social Audit, Mizoram Village (Sanitation) Rules, 2017, Ran khuahkhirna leh chhiah lakna dan, The Mizoram Forest Act 1955, Kangmei venna dan te bakah Office enkawl dan ahte zirtirna neih a ni dawn a ni.

Extension Training Centre hian VC thlan tharte tan training a buatsaih zel dawn a, Covid-19 hrileng avanga Training Centre-a kal thei lo te tan pawh a tul angin ruahmanna a siam zel dawn a ni. Training bakah hian khawtlang hmasawnna kaihhnawih thil hrang hrangah zirbingna (research) a kalpui thin bawk a ni.