No.5806/2020-2021

Dated Serchhip, the 6th October, 2020: Vawiin hian Serchhipa Village Council VII leh Village Council VIII te chuan Faina hapta denchhenin an veng chhung thenfai hnatlang pui an nei a. DC Office staff te pawhin an pisa tifaiin hnatlang an nei bawk.

Serchhip Village Council VII te hian run thlak hnatlang an kova, mi 100 vel hnatlang thawk chhuakin veng chhung hmun hrang hrangte tifaiin hun an hmang an ni.

Serchhip Village Council VIII pawhin khawtlang huapin run thlak hnatlang an nei bawk a, vawiina an hna thawhte thawh chhunzawm turin a tul anga hnatlang koh zui zel an tum a ni.

Deputy Commissioner Office-a thawktute pawhin faina hapta pual hian an pisa tihfai hnatlang runpui an nei a, pisa chhung leh a chhehvelte an tifai a ni.

Heng faina hapta puala hnatlangte bawlhhawlh paih sak tur hian District Urban Development Office chuan an lirthei an thawh thin a ni.

Faina Haptaah hian Pisa fai inelna, zirna in inelna, Hospital leh Restaurant inelna te leh veng inelna (VC Area in) buatsaih a ni a. He inelna hian kumin chhung a tluan dawn a, nakkum Republic Day ah result puanna leh lawmman semna neih tura ruahmanna siam a ni.