No.5805/2020-2021

Mamit 6th October, 2020 : Vawiin khan W.Phaileng-ah Assistant Registrar Cooperative Societies (ARCS), Mamit District leh W.Phaileng Farming Cooperative Societies Ltd buatsaihin Pradhan Mantri Vandhan Yojana (Vandhan Mission) chungchang leh loneitute thlai chin dan, a enkawl dan inzirtirna leh inhrilhhriatna hun hman a ni.

Pu A.N Barbhuiya, Assistant Registrar Mamit chuan Mamit District chhunga Vandhan Mission kalpui dan leh he Project-in a tum tlangpui sawifiahna neiin he Scheme- hi India ramah Kum 2018 a hman tan niin Mizoramah erawh chuan 2020- atangin hman tan a nih thu a sawi a. He Mission-in a tum ber chu thingtlang loneimite chawikan a, an thlai tharchhuahte man man zawk leh awlsam taka an hralh zung zung theihna tura Sawrkar ruahmanna anih thu a sawi. W. Phaileng bikah chuan Mizo Chilli leh Sawhthing herna khawlte bun tum a ni a, Vandhan Vikas Kendra (VDVK) pahnih W.Phaileng Farming Cooperative Societies Ltd leh W.Phaileng LAMPS Cooperative Society Ltd- te thlan an nih thu a sawi a ni.

Mamit Co-operative Societies, Senior Inspector, Pu Lalthangfala chuan VDVK Level Advocacy Programme kalphung sawi hawnna neiin Training hian Ni 6 - 9 October, Ni 4 chhung a awh dawn thu a sawi a, mi 15 theuh awmna Self Help Group 40-te hnenah Covid-19 SOP-in a phal chinah a inchhawkin Training-hi neih anih tur thu a sawi.

Vawiin Training- petu Pu P.C. Lalruatfela, FOCUS Agriculture Department, Mamit chuan Mizo Chilli chin hun leh leilung sawngbawl dan, Hmarcha natna hrang hrang laka enkawl dan, hlawk zawka chin dan, Thlai damdawi leh leitha hman dan diktak, hlawk zawka thar tura thlai enkawl dan, leilung tihthianghlim dan leh sawngbawl dan, leitha pek dan dik/tha, hmarcha ei chhetu rannung hrang hrangte leh a enkawl dan chungchangah kuthnathawktu kalkhawmte chu zirtirna a pe a. Mizo Chilli thatnate sawiin Cholesterol Level tih hniam nan, Ruhsehna tihziaawm nan leh taksa vungah pawh thisen luang a tih chak theih thu a tarlang a ni. DIPRO Mamit pawhin thusawina hun neiin vawiin Training- hawnna hunah hian fuihna thuchah a sawi bawk a ni.

Vawiin Vandhan Mission Training- hawnna hun hi Pu Rokima Pautu, Chairman, W.Phaileng Farming Societies Ltd chuan a kaihruai a. Zawhna leh chhanna hun tha tak hman a ni bawk.