No.2608/2021-2022
Aizawl 14th October, 2021: Animal Husbandry & Veterinary Department Minister Dr. K. Beichhua chuan vawiin khan Lunglei Farm Venga District Veterinary Hospital leh Lungpuizawl AH&Vety Farm-a ar awp keuna leh Broiler ar vulhna (Hatchery cum Poultry Farm) tur a hawng.

Lungpuizawl Veterinary Farm-a hawnna inkhawm buatsaihah AH&Vety Minister Dr. K. Beichhua chuan thu sawiin, AH&Vety Minister a nih tan atangin sa-a Mizoram intodelh lohnaah hmalakna tur tam tak an nei tih a hriat nghal thu leh chumi atan chuan theihtawp an chhuah tih a sawi a, ran lakluh an khap thu leh thalai tam tak ran vulhah ke an pen thu leh, vanduaithlak takin beisei phak loh vawk pul hri African Swine Fever (ASF) leng vangin Zoram mipuiin kan tuar ta a ni, a ti.

Zangnadawmna pe ngei turin sorkarin theihtawp chhuahin hma a la mek tih Dr. K. Beichhua chuan a sawi bawk a, sorkar laipuia dilna an zuk thlen tawhte pawh chak takin an bawhzui mek zel a ni, a ti.

AH& Vety Minister chuan Veterinary Science chu ram changkang apiangah a hlu tih sawiin ran duat taka enkawl kawngah kan harh thar mek zel a, zirlaite pawh Veterinary Science ah kawng zau tak a inhawng mek zel a ni tih hriain Veterinary Science zirnaah ke pen zel turin a sawm nghal bawk.

Dr. K. Beichhua chuan ASF kaihhnawiha zangnadawmna pek chungchangah nasa takin Social Media ah thu chiang lo an vawrh darh thin chu pawi a tih thu sawiin, Social Media te pawh hi midang tana malsawmna atana hmang a, inhnialna at thlak takte ban san a hun tak zet tiin a sawi bawk.

SEDP AH&Veterinary Board Vice-Chairman Pu C. Lalmuanpuia, MLA pawhin thuchah sawiin, Veterinary Hospital leh Artui Awpkeuna an hawn tak te chu ranvulh kawngah Lunglei District in hmasawnna rahbi thar a chuang kai a ni a ti a, Veterinary Hospital hawn tak pawh tangkai takin mipuiin an chhawr theih ngei a beisei thu a sawi.

SEDP Bamboo Development Board Vice-Chairman Dr. K. Pachhunga, MLA pawhin Lunglei District-a AH & Vety Department hmasawnna chu mipui tan lawm loh theih loh a ni, a ti a, Lunglei aiawhin Minister leh a Department thawktute zawng zawng chungah lawmthu a sawi nghal.

Lunglei District Veterinary Hospital hi Rs cheng nuai 90 senga sak niin, NABARD-RIDF atanga sum hmuh hmanga sak a ni a, kum 2019 March thla khan hna thawh tan a ni. AIE Construction, Tuikhuahtlang Aizawl ten a sak hna an thawk a ni.

Lungpuizawl Farm-a ar awpkeuna leh Broiler ar vulhna hi kum 2017-18 ah NABARD RIDF atanga Rs cheng nuai 519.25 hmuh atanga sak a ni a, Aarkon Infrastructure, Uttar Pradesh ten a sak hna an thawh.

Ar awpkeuna atang hian ni 21 chhungin ar note 5000 a awpkeu thei dawn a, ar note 2400 vulhna tur in sak a nih bakah ar puitling deuh 2400 vulhna tur in sak a ni bawk a, power supply khaihlak lak atanga venna turin generator lian dah a nih bakah a enkawltute chenna tur Quarter sak a ni bawk.

Hawnna inkhawm Lungpuiazawl hman hi AH&Veterinary Secretary Pi Lalzarmawii, IAS in a kaihruai a, Director Dr. H. Laltlanmawia'n Technical Report a pe.