No.2609/2021-2022
Aizawl 14th October, 2021: Social Welfare Minister Dr. K. Beichhua chuan vawiin khan Eklavya Model Residential School (EMRS) Pukpui, Lungleiah Building thar pali a hawng.

EMRS Pukpuia hawnna inkhawm hmanah Social Welfare Minister Dr. K.Beichhua chuan EMRS chu Tribal Zirlaite tana Ministry of Tribal Affairs (MoTA) flagship programme a ni a ti a, Mizoram atanga hun rei tak UPSC exam kan tling thei tawh lote hi tan a na hle a, zirnaah nasa zawka hma kan sawn theih nan EMRS hi Mizoram RD Block tinah dah tumin hma kan la mek a ni, a ti.

Dr. K. Beichhua chuan EMRS chu Society in a enkawl tawh tih sawiin State ah pawh Governing Board in a enkawl thin chu EMRS Society in a enkawl tawh a ni, a ti a, hei vang hian Recruitment pawh Central lamin an kalpui tawh dawn a ni, a ti. Zirtirtute fuihna thuchah sawiin, mawhphurhna sang tak in chelh a ni a ti a, naupang nun khalh ngil hunlaia ngil taka kal tir theih chuan zirnaah pawh hlawhtlinna tha tak an hmuh ngei a beisei thu a sawi a, Hlawh ringawt beisei lo leh hlawh ngar ngar um tu ni lovin, kan hnathawh hi hlawhin um zawk rawh se, tiin Dr K. Beichhua chuan a sawi bawk.

SEDP Veterinary Board Vice-Chairman Pu C. Lalmuanpuia, MLA pawhin EMRS chu zirna kawngah Mizoram bung thar min chuankai tirtu a nih ngei a beisei thu a sawi a, Bamboo Development Board Vice-Chairman Dr. K. Pachhunga pawhin zirtirtute fuihna thuchah sawiin, tha taka hnathawh hi a inchhirawm ngai lova, theihtawp chhuaha beih ngar ngar naah malsawmna a awm thin a ni, a ti.

Building thar pali hawn tak te hi Ministry of Tribal Affairs atanga Rs cheng nuai 331.87 hmuh atanga sak niin, kum 2018 October atangin Lushai Engineers, Ramhun Venglai, Aizawl ten a sak hna an thawk tan a ni. Building pali te hi Ground Floor leh First Floor nei vek a ni a, Girls Dormitory, Boys Dormitory, Additional Classroom leh Staff Quarters building te an ni.

Building thar hawnna inkhawm hi Social Welfare Secretary Pi Sangchhin Chinzah in a kaihruaia, Director Pi A Vanlalzawni'n EMRS chanchin tlangpui a sawi a, Social Welfare Department AE Pu Lalthankima'n Technical Report a pek bakah EMRS Pukpui Principal Pu Lalnghinglova'n lawmthu a sawi a. Social Welfare Minister Dr.K.Beichhua hian vawiin vek khan Lunglawn, Lungleia Mara Tribal Girls Hostel sak mek a tlawh nghal bawk a ni.