Animal Husbandry & Veterinary Department hnuaia Vety daktawr inzawmkhawm pawl Mizoram Veterinary Service Association chuan vawiin khan Selesih a Vety Rest House ah Annual General Conference vawi 35 na an hmang a, AH&Vety Minister Dr. K. Beichhua chuan khuallian niin he hun hi a hmanpui a ni.

Vety daktawr rual kalkhawm hmaah thusawiin Dr. K. Beichhua chuan Vety Science hi thiamna sang bik, a bik a inzir te thawh chi anih avangin ran vulhtu te pawhin an lakah beiseina sang tak an nei a ni a ti a, Mizorama BPL chhungkaw tam ber innghahna chu Vety hnuai, “ranvulh” a ni a, BPL mai nilo APL leh Sawrkar hnathawk chhungkua ah pawh ranvulh chhungkua hi a tam zawk kan nih a rinawm a, vety daktawr ten mawhphurhna kan nei sang em em ani a ti a, ranvulhtute tun aia dinhmun tha zawk a kan dah theih nan tha thlah lova tunlai thiamna nen tangkawp a tan kan lak reng a pawimawh a ni a ti bawk. Minister chuan ran chaw man to lutuk vanga harsatna kan tawh chu a vei thu sawiin Mizoramah  anih tur anga ranvulhtute kan hlawk theihloh chhan pakhat niin a hriat thu a sawi a, Socio-Economic Development Programme (SEDP) hnuaiah chuan ranvulhtute hnenah ran chaw subsidy a pek tum ani ang tiin hei hian harsatna a sut kian a beisei thu a sawi. Hei bakah hian Horticulture department leh Department dang te nen ran chaw atana raw material thar chhuah kawngah tan lak ho dan zawn a tul a ti a, price support scheme mumal taka kalpui  tul a tih thu a sawi bawk.

Minister chuan AH&Vety Department chan tir ani chu vannei a intih thu sawiin an department Minister anih hian lal emaw, an hotu anmahni hrawk deuh reng tura Pathianin a dah anih loh thu sawiin department a thawk ten an finchhuah a, nawr a tul a an nawr kal turin leh thawhhona tha nena anmahni kaihruai tur anih zawk thu a sawi a, an pawl (Service) thil a pawimawh rualin mipuite leh ram leh hnam rawngbawltu an nih inhre tur leh chumi chu dahpawimawh hmasa zawk turin a chah a ni.

Vawiina Mizoram Veterinary Service Association khawmpui hi hun hnih a then niin chawhma lamah an pawl President Dr. Lalremliana kaihhruaiin rorel inkhawm an nei a, hetah hian kum kalta chhunga an member boral pahnih Dr. C.Laldailova leh Dr. R.Kapthuama te sunna hun an hmang a, hemi zawh a an thurel zingah ranvulhtu ten ran chaw man to lutuk vanga harsatna an tawh sutkian nan food subsidy an hmuh theih na tura sawrkar hnena thlen te, ranvulhtute hnenah feed awareness leh ran enkawl chungchang inzirtirna uar lehzuala kalpui te, District tina ran talh zawrh chhuahte an thianghlim leh thianghlim loh endik tur meat inspector post siam tura hmalak te, Mizoram chhunga Vety Dispensary leh thingtlang lama an hmun hma tlabal tawh te thawm that dan kawng ngaihtuah te a tel a ni.

Chawhnu inkhawm hi Dr. C. Lalrintluanga, Vice-President, MVSA in a kaihruai a, Dr. Lalremliana, President, MVSA in keynote address pe in Dr. V. Lalzarzova, General Secretary, MVSA in report a pe a, khuallian Dr. K. Beichhua, AH& Vety Minister leh Dr. Hmarkunga, Director, AH&Vety ten thu an sawi hnu ah Dr. F. Laldawla, Secretary i/c Information and Publicity, MVSA in lawmthu sawina in hnu a khar a, zanriah an kilho nghal a ni.

AH&Vety Department hi kum 1974 khan Agriculture Department tangain Joint Director kaihhruai turin an indang a, kum 1980 khan anmahni pual Director neiin Department puitlingah hlan kai an ni a, tunah hian MVSA ah hian member 101 an awm mek a ni.