Biate Area Mizoram Upa Pawl  (MUP) Meet vawi 24-na  chu vawiin khan Riangtlei Community Hall-ah  neih a ni a. He hun hi Pu Lalrinliana Sailo, Speaker, Mizoram Legislative Assembly chuan khuallian niin a hmanpui.

Khuallian chuan Mizoram Upa Pawl Biate Area chu hruaitu tha tak takte hruaina hnuaia a awm thu sawiin khawchhe tak hnuaia hlim taka inhmukhawmna hun hmanho ani thei Member-te inpekna rah ani,  a  ti a. MUP Member-te chu kum lamah upa tawh mahse ram tana thawhhlawk tak tawngtaina hmachhuantu, tawnhriat  thiamna leh finna  hmanga ram khalh ngil theitu an ni tih hre thar leh turin a chah a. Upate thu chu thu puitlinga ngaih anih thin angin ram kalsual tur leh chhelaite siam tha tura thurawn pea huaitaka penchuak thin turin a ngen bawk. 

Mizoram Legislative Assembly Speaker chuan Zo hnahthlak hmun hrang hranga awmte chu engtikniah emaw chuan rorelna pakhat hnuaiah kan la khawsak ngei a rin tlat thu a sawi a. Lungrual leh inrem taka khawsakho a pawimawh hmasa a ni, a ti a. Bialtu  MLA leh Deputy CM ni bawk Pu Tawnluia'n a damlohna khum atangin bial a ngaihtuah em em a, Pathin zarah a dam leh vat anga, abial mipuite tan chak takin hna a thawk dawn a ni, a ti a.  Sawrkar tharah hmabak tam tak a awm a,  hruaitu thiam leh viak tha tak takte hmangin hmasawnna ruhrel leh rotling siam kawngah chak taka hmalak tum a ni, a ti bawk. Bialtu MLA, PHE Minister hmalaknain 

National Rural Drinking Water Programme hnuaiah  Riangtleiah tuilakna  Rs 149,38,000 hu  siam tum anih thu a sawi bawk. Upa pawl member te chu hun tha leh duhawm tak hmanga Khawmpui hlimawm tak hmang turin duhsakna a hlan a ni. 

He hun hi Pu R.Sangkunga, President, Biate Area MUP chuan a kaihruai a. Upa Khawkhama'n hunserh a hmanga. Pu Lalrema, Sialhawk North Unit in palai leh khuallian lawmna thu a sawi a. Kum kalta a member thite sunna hun neih a ni a.  Kum 2019-2020 chhunga hruaitu tur thlanna neih a ni a, Pu Tlangchhuana, Asst Secretary, Biate Area MUP-in lawmthu sawina neiin hun a   khar a ni.

Biate Area MUP  hnuaiah hian khaw 5;  Biate, Sialhawk, Tlangpui, Tlangmawi  leh Riangtleite awmin branch  8; Biate 3, Sialhawk 2 leh Tlangpui, Tlangmawi leh Riangtleiah te pakhat theuh a awm a. Tun dinhmunah member 695, Mipa 326 leh Hmeichhia 369 an awm mek a ni.

Attachment

  • Loading attachment...