Vawiin khan Cultural Heritage Centre, Venglai, Lunglei ah Enviroment, Forest & Climate Change Department leh All Mizoram Farmers Union (AMFU) te tangkawpa buatsaih Awareness Campaign on Climate Change for the Farmers of Mizoram chu neih ani. Pu Lawmawma Tochhawng, Vice Chairman, High Powered Committee, Lunglei chuan khuallian niin a hawng.

Awareness Campaign hawnna inkhawm hi Pu Joseph H. Thanzuala, President, AMFU General Hqrs. in kaihruaiin Pu Lawmawma Tochhawng chuan Pathianin a thil siamte duat taka enkawl hi kan mawhphurna ani ati. Khawvel ah sik leh sa danglam lutuk hi an buaipuia, mihring nun thlengin a nghawng ani, kan eizawnna kawngah harsatna tam tak sik leh sa danglam hian min siam a, chuvangin hmachhawn dan tur kan ngaihtuah a ngaih thu a sawi. Sik leh sa danglam lutuk tuartu ber chu loneitute an ni a, thing leh mau kan ti chereu thin  bakah ram zau tak tak kan tih kan thin hian tuihna a ti tlem a, thlai chawmna tur tui a tlem avang hian loneitu te tharchhuah a tlem phah ani ati. Ram leilung kan enkawl dan hi diklo avangin nungcha te an tlem a, boruak thianghlim a tlem phah bawk ati. Thing leh mau ti chhelo zawnga eizawnna nghelnghet kan nghaihtuah ngaih thu sawiin Mizoram sorkarin sik leh sa in nghawng thalo do let turin hma a la mek a, ruahmanna tha tak SEDP hmalakna in loneitu te tana tangkai tur tak Bomboo Development Policy a kalpui tur hi sik leh sa danglam tur a ven a ring.

Pu Zion Lalremruata, General Secretary, AMFU Gen. Hqrs. chuan AMFU hnathawh hrang hrangte sawiin, sik leh sa danglam lutuk venna kawngah kuathnathawktu ten Mizoram sorkar chungah beiseina sang tak an neih thu asawi. Dr. David C. Vanlalfakawma, Scientist, Biodiversity & Nature Conservation Network leh Pu Timothy Lalrinfela, Scientist, Soil Science, KVK Hnahthial, Lunglei District ten sik leh danglam dan leh a vendan an sawi.

Awareness Campaign ah hian Lunglei, Lawngtlai leh Siaha District atanga loneitu thlanbik te an tel ani.