Vawiin khan Tourism Minister Pu Robert Romawia Royte chu Tripura Group YMA Conference Vawi 30-na  Behliangchhip, Zampui Tlang, Tripura a neih ah khuallianah a tang.

Zampui tlang dunga YMA group hrang hrang te inhmuhkhawmna ah hian khuallian Pu Robert Romawia Royte chuan Mizoram sawrkar in Zofate Insuihkhawm a ngaipawimawh a ni a ti a, hemi kawngah hian sawrkar thar in chak takin hma ala zel dawn a ni tiin Hnam Huapzo sawrkar Chief Minister Pu Zoramthanga kaihhruaina hnuaiah neih a ni ang a ti. Tourism Minister hian State danga awm Zofate Chu YMA hmanga in pawh  lehzual turin a chah a, ram leh Hnam humhalh nan zirna leh taimakna uar lehzual turin a chah a ni. Pu Robert Romawia Royte chuan thalai te chu beidawng lova, beiseina thar nena hna thawk thar leh Turin a chah a, hnam dang nupui/pasal neih chungchang ah pawh an fihlim a ngaih thu a sawi.

Mizoram sawrkar thar chuan hun reilo te chhungin chak taka hna a thawh thu a sawi a, kawngpui siam hna chak taka kalpui a nih thu leh chief minister hova Mizoram hmasawnna nana tha lehzuala hna an thawh mek thu a sawi.

Khualzahawm Er. H. Lalzirliana, MLA pawhin thu sawiin kalkhawm mipuite chu ram a chhiat loh nana venghim tur an nih thu a sawi a.  Zo hnahthlak/ Mizo Zampui tlangdunga chengte chu nek chepna kara awm thin ni mahse Mizoram tana himna kulh bang ni reng turin a chah a ni. Mizo, Kristian, Tribal nih tluka hlu hi khawilaiah mah a awm lo a ni a ti. Roads and Infrastructure Development Committee Vice Chairman ni bawk Er. H. lalzirliana hian sawrkarin zo hnahthlak hmun hrang hranga awmte a ngaihsak a ni a ti. 

Tripura Group YMA conference ah hian Tourism Minister leh amah tawiawmtute bakah CYMA, MZP hotute bakah hmun hrang hrang a Mizo/Zohnahthlak intelkhawm ten Palai an tir a ni. March ni 13 1989 a din Tripura Group YMA ah hian branch 18 awmin member 2496 an awm mek a ni.

Tukin khan Tourism Minister Pu Robert Romawia Royte leh Er. H.Lalzirliana te hian Tlangsam khua,  Zampui Tlang, Tripura a Hnam Pasaltha Corp. Vanlalchhuanga thlan an tlawh a,  Zampui NGO hrang hrang hotute nen inkawmna an neih bakah Vanghmun khaw playground gallery Tourism Minister hian a hawng bawk a ni.

Nimin khan Aizawl chhuah sanin  Tourism Minister hian Kanhmun Tourist Lodge a tlawh a, hun rei tak chhung rauhsan tawh Zawlnuam Tourist Lodge pawh tlawhin thla thar hian khualzin te hman theih tura hawn tum a ni. Nimin vek khan Minister thar  leh Mizoram sawrkar thar lawmna  Hmawngchuan khua, Zampui tlang Tripura a neih ah a tel bawk a ni.