Vawiin khan Mizoram Pig Producers’ Cooperative Federation (PIGFED) Ltd. chuan General Assembly vawi 22-na AH & Vety Conference Centre, Khatla-ah an hmang a. AH & Vety Minister Pu C.Ngunlianchunga chu khuallian a ni.
Pu C.Ngunlianchunga chuan Mizote hi vawksa ei nasa hnam kan nih avangin a hralhna hi englai mahin a buai ngailo mai ni lovin kan rama kan tharchhuahin a daih sen loh avangin ram dang atangin tam tak chawk luh a ngai zawk a ni, a ti a. NLUP -a vawkvulh thlangtute leh sorkar laipui hmalakna peng dang atana mamawh vawk note sing tel hi State dang leh ram pawn atanga chawk luh a ngaih thin avangin sorkar laipui atanga kan sum dawn tam tak ram dangah a luang chhuak leh thin chu pawi tiin vawk vulhtute tan la thar turin a sawm a. Mi ramah vawk farm lianpui pui neia hausakpui nana an hmang ang hian vawk vulh hi Mizote’n eizawnna tlingah kan hmang ve thei tih hre thar turin a chah a ni. Minister chuan mipui zirtirnan ti a department-in demonstration farm a siamte pawh kum 40 a upa te hial an lo hi hlawm tawh a, inzirtirna lamah an kal thui tawk tawh viau nia hriain farm thenkhat chu khar a ni tawh a, khar belh zel an tum thu a sawi a. PIGFED Ltd. mi leh sate chu sorkara innghah ngai lova mahni ke ngeia ding thei turin a fuih a ni.
AH&Vety Director Dr LB Sailo pawhin thu sawiin hlawkpui tham tak taka vawkvulh tur chuan pahnih khat vulh a tawk lova, vawk 60 chuang, za tel thlenga vulh dan kan zir a ngai, a ti a. Mizote chuan pahnih khat vulhin kan ti ral zung zunga, kan tihralna mana vawk dang lak leh ai chuan thil dang mamawh lei nan kan hmanga, kan vawk vulh a pung hlei thei lova, vawk vulh lamah hma kan sawn theihloh phah a ni tih sawiin hemi kawngah hian ngaihtuahna thar kan sen a tul hle a ni, a ti.
Mizoram Pig Producers’ Cooperative Federation (PIGFED) Ltd. hi June ni , 1989 khan Cooperative Act hnuaiah inziak lutin he Federation hian Mizoram pumpui a huap a. Tunah hian PIGFED Ltd. hnuaiah hian society 172 an awm mek a ni.
Vawiin an Assembly hawnna inkhawm hi an Chairman Pu F.Zosanga’n kaihruain PIGFED Ltd. Managing Director Dr.Lalnuntluanga Colney hnen atangin report ngaihthlak a ni bawk.
