Home Minister Pu R. Lalzirliana chuan vawiin khan Khawbungah Tuipuiral Zirlai Pawl (TZP) buatsaih 'Education Awareness Campaign 2015' kharna a hmanpui a. East Tuipui bialtu MLA leh Mizoram Youth Commission Chairman ni bawk Pu T. Sangkunga'n a tawiawm a ni.

Home Minister chuan Tuipuiral Zirlai Pawl-in zirna ngaipawimawh a awareness campaign an huaihawt chu ropui a tih thu sawiin, zirlai te hma ngai tura pawl din an nihna nen pawh a inhmeh hle a ni, a ti a. Mizoram sorkar chuan zirlaite tan thahnem ngaiin zirna tihchangtlun mai bakah hnathawh tur a dap sak zel thu a tarlang a. Sorkar hna dil turin thiamna chhawrtlak hi a pawimawh ber avangin duhsakna leh hmelhriat neih that vang ringawtin a luh mai mai theih loh thu Minister Pu R. Lalzirliana chuan a sawi a. Tunlaiah mithiam tam tak an awm tawh avangin tling tur chuan theihtawp chhuah a tul thu leh, Sorkar hnuai ah ringawt lo pawh hna thawh tur hi a ngaihven tan chuan a awm reng thu a sawi a ni.

Home Minister chuan zirlai kalkhawmte hnenah chuan nu leh pa thuawihna chuan dinhmun sang takah mi a vawrh theih thu leh, hemi kawnga nu leh pate bakah zirtirtute pawhin mawh an phurh tlan vek thu a sawi a. Dikna leh rinawmna ngaihlu a, mahni hnam tana rinawm turin leh Zoram tana mi chhenfakawm ni turin thuawihna leh finna nen zir zel turin kalkhawmte chu a chah a ni.

 Thusawitu dang Mizoram Youth Commission Chairman Pu T. Sangkunga chuan hlawhtling tur chuan eng zirna in atanga zirchhuak nge kan nih tih ai chuan zirlaia kan tumruhna, teirei peihna leh rinawmna a pawimawh hmasa zawk a ni, a ti a. Tunlai khawvelah thiamna in hmun pawimawh ber a luah tawh a ni tiin, tuna zirlaite pawhin hma hun tur thiam taka thlir turin leh, tum fel tak nei a, chumi tihlawhtling tura bei turin zirlaite chu a sawm a. Skill Development-a MYC in thalaite tan a hmalakna leh, phai lama training tura an tirh chhuah tawh mi 1600 chuang zingah mi 460 chuang chuan hna an hmuh tawh thu a tarlang bawk.

Education Awareness Campaign hi June ni 4 atang khan TZP chuan kalpuiin, East Tuipui Constituency bial chhunga khaw 25 ah zirna beihpui hi an thlak a. Vawiin a kharna hun, Khawbung Community Hall-a neihah hian Khawbung HSS Principal Pu H. Lalnunmawia chu resource person niin, Tuipuiral biala zirna hmasawn tur chuan Primary school level atangin tan lak a pawimawh thu a sawi a ni. He hunah hian Pu F. Vanlalriana, Khawbung VCP, Pu CS Zodinsanga, TZP President leh Pu H. Lalniliana, Tuipuiral NGO Coordination Committee Chairman ten thu an sawi bawk.

Home Minister hi department official ten an tawiawm bakah NGO hrang hrang hruaitute, VC leh Party hruaituten an tawiawm a. Education Awareness Campaign programme bakah hian Dungtlang Police Outpost leh Khawbung Mini-Sports Complex sakna tur hmun a enfiah bawk.