No.4442/2021-2022
Aizawl the 29th March, 2022: Animal Husbandry & Veterinary Minister Dr. K. Beichhua chuan vawiin chawhnu dar 01:00Pm khan cheng nuai Rs.119.22/- senga sak Siaha District Veterinary Hospital a hawng.

Vety Hospital hawnna-ah thu sawiin Minister chuan District Vety Hospital an hawng thei ta hi Siaha tan ni chhinchhiah tlak a ni. Vawiin Hospital kan hawn tak hi Siaha mipui ten neitu rilru pu chunga kan enkawl a, kan hman tangkai thiam a ngai a ni. Kan ramin kan tlakchham thil pawimawh tak chu neitu rilru putna chang kan hriat thin lo hi a ni, a ti.
Kan state a vawk pul hri leng rem theih lo chhan chu mipui ten thu kan awi tawk thin loh vang a ni. State pawn lam atanga vawk lakluh te sawrkarin a khap a, mahse a rukte a lo lalut duh tawk kan awm leh thin.Tunah pawh hian African Swine Fever hi a reh hlei theih lo a ni. A ziaawm tawh dawn emaw kan tih lai in Sakawrdai leh Champhai lamah hmuhchhuah a ni leh a, he hri hi Vety Department chauh chuan do hneh chi a ni lo, mipui kan tanrual a ngai a ni, tiin Siaha mipui pawh sawrkarin khapna thu a chhuah te zawm a, mitin kan fimkhur a ngai a ni, a ti bawk.

AH&Vety Department thawktute fuihna thuchah sawiin, Minsiter chuan Technical Department dang, Engineering Dept, Agriculture, Health Department etc. te nen kan line-ah thiamna inang leh Pay Scale in ang kan ni a, kan hniam bik tur a ni lo, a ti. Minister chuan Siaha district mipui te hnenah thuchah sawiin, kan district in a mamawh ber chu mahni intodelh tura taimak hi a ni, a ti. Mi taima lo an Intodelh thei lo a, intodelh lovin a changkan theih lo a ni, a ti.

Minister chuan tun sawrkar hian District 7 ah Vety Hospital a sa mek a, vawiina kan hawn nen hian 5 hawn tawh a ni a, 2 pawh reilo teah hawn theih a ni ang, a ti bawk.

Dr.Lalrinpuii Sailo, Addl.Director, AH&Vety Dept chuan Technical report pein, Siaha District Veterinary Hospital hi NABARD-RIDF XXIV atanga sak niin, a sak nan cheng nuai 119.22/- ruahman a ni a, Pu Daniela, Siahatlah in a sak hna a thawk a. October 2019 ah sak tan niin, March 2022 ah sak zawh a ni.

A building zau zawng hi 259.20Sq Metre a ni a, Zopa chhiara chhawng 2 a ni. Ground floor-ah Operation Theater, Recovery Room, Examination Room, Veterinary Officer room, Registration Room leh Waiting Room te a awm a, Toilet 3 a awm bawk. 1st Floor-ah hian room 5 awmin, staff room, computer room, store room te a awm a, toilet 3 a awm bawk.

Vawiina District Vety Hospital hawnna inkhawm hi Siaha District Veterinary Officer Dr. Sahlu Khaila in a kaihruai a, ECM kohhran Senior Executive Secretary Rev.VL. Ngaia Hlychho-in hunserh hmangin, AH & Vety Additional Director Dr. Lalrinpuii Sailo in technical report a pe a, Veterinary Officer Siaha Dr Lalrengpuii Sailo in lawmthu sawiin hun hman tih tawp a ni.