No.4443/2021-2022
Aizawl 29th March 2022: New Delhi-a cham mek Tourism Minister Pu Robert Romawia Royte chuan vawiin khan Minister of State for Steel Pu Faggan Singh Kulaste kawmin Steel Ministry atanga sports infrastructure siam Mizoram Sorkarin a rawtnate an sawi dun a, Union Minister chuan theihtawp chhuahpui a tum thu a lo hrilh a ni.

ICT Minister ni bawk Pu Robert Romawia Royte chuan DoNER Secretary Pu Lok Ranjan pawh kawmin DoNER hnuaia NESIDS Guidelines-in Sports infrastructure a huam lo chu Central Sorkar tihsual lian tak a nih avangin he Guidelines hi siamthat vat a rawt a. Minister chuan Scheme of NEC-ah state chhunga a hnufual laite ngaih pawimawh tur tih a nih angin Mizoram hnufual lai tihhmasawnna tur project te an sawi dun a, Minister-in Zoram hnufual lai chawisanna tur project a sawi chu a lo ngaihtuahpui ngei tur thu a lo hrilh a ni.

Tourism Minister hian Union Finance Secretary Pu T.V. Somanathan pawh kawmin Minister chuan Mizoram chu a bika puih tlak a nih angin hrereng turin a ngen a. Union Finance Secretary chuan Finance Ministry in Central Special Assistance to States for capital expenditure sum a pek tur chu chak taka Mizoramin a hman theih chuan ‘additional’ pek theih a nih thu a lo hrilh a ni.

Tourism Minister chuan Niti Aayog hotute pawh kawmin Sports leh Tourism tihhmasawnna tur project an kuta awmlai mek chu tifel rang turin a ngen a, Niti Ayog hotute chuan tihbelh ngai laite sawiin Mizoramin a tihbelh veleh an lo pawmpui mai tawh tur thu an lo hrilh bawk.

Sports Minister chuan Ministry of Youth Affairs & Sports a Official te a meeting pui bakah Power Ministry hotute nen Mizoram Tourism tana Bus lei dan turte an sawiho bawk a ni.

Tourism Minister hian vawiin tlaiah Mumbai a Chapchar Kut hmanpui turin New Delhi chhuahsanin Mumbai a pan dawn a ni.