No.4444/2021-2022
Aizawl, the 29th March, 2022: Nizan March ni 28, 2022 zan dar 9 vela Kawlkulh khuaa Pu C.Laldanga te chhungkaw chenna in, Assam Type a sak kangmei chhuak avanga kângral vek tanpuina chu State Disaster Response Fund (SDRF) kaltlangin vawiin khan Pu C.C. Lalchhuangkima, Deputy Commissioner, Khawzawl District ruahmannain Pu H.Lalramenga, SDC & DM&R Nodal Officer chuan kang tuartute hnenah a hlan.

Pu C. Laldanga in hi nizan dar 9:00 vel khan kang in, an awmna hi a fal deuh avangin khawchhung mi tlawmngaiten theihtawp an chhuah chungin bungrua chuh hman lohin a kangral vek hman a. He inah hian a chungah Pu C.Laldanga te chhungkua member pathum chengin, inhnuai hi a fapa Pu Malsawmdawnga te chhungkua member pali awmna ten an luah bawk. Kangmei chhuah lai hi ram lama hnathawka an riah lai leh, in nghaktute pawh pawna an chhuah lai tak a ni a, vanneihthlak takin mihring nunna chan leh hliam tuar an awm lo hlauh a ni.

He chhiatna thlen chungchang hi hriat a nih ve leh District Bawrhsap Pu C.C. Lalchhuangkima kaihhruainain hma lak nghal a ni a. Vawiin khan Pu H.Lalramenga, SDC & DM&R Nodal Officer chu Kawlkulhah kalin kangmei chhuahna hi a hmunah a tlawh a, SDRF atangin in kâng bakah bungbel leh bungrua an hloh chhawmdawlna pawisa fai Rs. 1,05,700 (Cheng nuai khat sangnga leh zasarih) leh silpaulin pahnih chu kangmei tuar chhungkaw pahnihte kutah a hlan a. Kawlkulh Village Council President leh VLDMC Chairman Pu Vanlalhruaia hnenah hnatlang thingpui lumna tur pawisa fai a hlan bawk.

In kang tuartute chhawmdawlna hlan zawhah hian khawtlang hruaitute nen hmalak zel dan tur sawiho a ni a. In hi khawtlang tangruala sak that tura ruahmanna siam niin, Kawlkulh leh Kawlkulh North khawtlangin a sakna tur châk lakkhawm leh vehbur khawnte an buaipui dawn a. Hemi chhung hian kangmei tuar chhungkuate hi Forest Rest House-ah an khawsa rih dawn a ni.

He hunah hian Kawlkulh leh Kawlkulh North khawtlang hruaitute nen hian kangmei chhuah chhan hrang hrang langsar zualte leh inven theih dante sawiho a ni bawk.