No.61/2021-2022

AH&Vety changtu Minister Dr K Beichhua chuan Lungsen khuaa vawk hri leng mek avanga harsatna tawh mek chu a hmuna enfiah tur leh hmalak tul te ruahmanna siam turin vawiin chawhnu khan Lungsen a tlawh. Minister hi Aizawl atangin AH& Vety Director Dr H.Laltlanmawia leh Deputy Director Dr C.Lalrintluanga ten an rawn tawiawm a. Lungsen ah hian Lunglei DC Pu Kulothungan A, AH & Vety officials-te leh Lungsen khawtlang hruaitute leh tlawmngai pawl ten anlo dawngsawng a ni.

Dr George Martin Lalruattluanga, Veterinary Officer Tlabung-in vawiin chawhnu dar 2:00 a report a tih chhuahah Lungsena vawk thi tawh zat hi a zavaiin 276 niin vawiin bika thi chu 31 an ni a. Report hnu hian thih belh engemawzat an awm bawk a ni.

Official-te, Lungsen khawtlang hruaitute leh tlawmngai pawl aiawhte nena Lungsen RD Rest House-a inkawmhona neihah AH&Vety Minister Dr K Beichhua chuan Lungsen mipuite harsatna nasa tak tawh mek chu a tawrhpui takzet thu sawiin he hrileng darh zel lohna turin Department chuan theihtawp a chhuah mek a, sawrkarin a tih theih chin chu a til zel dawn a ni, a ti. Lungsen khawtlang hruaitute, tlawmngai pawlte leh mipuite tlawmngaihna chu fakawm a tih thu sawiin he harsatna lian tham tak hi AH&Vety Department chauhin a buaipui thei lo a ni tiin kalkhawmte chu thawhho pui leh hmalak pui chhunzawm zelah a sawm.

Lungsen khaw chhungah hian YMA Branch pathum – Lungsen North, Lungsen Chhimveng leh Lungsen Venglai a awm a, YMA Branch tin te hian khaw daiah vawk thi phumna hmun ruahman hran theuhin an Branch area chhunga vawk thi te heng vawk thlanmualah hian an phum thin a ni. AH&Vety Minister chuan heng YMA Branch pathum te hnenah hian cheng sing hnih (Rs. 20,000/-) theuh a hlan a ni.

AH&Vety Minister leh amah zuitute hian vawiin vek khan Lungsen North leh Lungsen South vawk phumna hmun te a hmunah kalin an tlawh a, ruahmanna siam tawh te enfiahin thawktute ruahmannna an siam pui a ni.

Ni 21.03.2021 atang khan Lungsen khua ah vawk a thi tan a. Chief Veterinary Officer Tlabung in ni 25.03.2021 report a dawng a. A tuk ni 26.03.2021 ah CVO Tlabung leh Veterinary Officer ten Lungsen khua hi an thleng a, vawk hri dinhmun te a hmun ah enfiah a blood sample te la in Rapid Antigen Test hmangin test an nei nghal a. Result a chian theihloh avangin tissue sample leh serum sample an lak te chu Epidemiological Centre Khatla a test turin an thawn phei a. Sample te hi PCR hmanga test turin College of Veterinary Science & AH Selesih ah thawn nghal a ni a. PCR test result hi ni 02.04.2021 ah hriat niin vawk hri thenkhat – Common Swine Fever (CSF), Porcine Reproductive and Respiratory Syndrome (PRRS) leh Porcine Circovirus (PCV) te a negative vek tih hmuhchhuah a ni a. Vawk natna inkaichhawn awlsam leh hlauhawm tak African Swine Fever (ASF) rinhlelhawm a nih leh nih loh chu RT-PCR hmangin sample chu test leh niin hemi result atang hian African Swine Fever anih rinhlelh a ni.

National Institute of High Security Animal Diseases (NIHSAD), Bhopal ah finfiah turin sample hi test leh ani anga, ASF anih chuan NIHSAD, Bhopal hian an puang dawn a ni. Dr C Neihthangpuii, VO, Epidemiological Centre Khatla chuan vawiin tlai khan sample hi NIHSAD, Bhopal a thlenpui tawh a, result hi hriat theih thuai beisei a ni.

Chief Veterinary Officer Tlabung Dr K. Lalhlimpuii chuan The Prevention & Control of Infectious and Contagious Diseases in Animals Act, 2009 Section 20 behchhanin Lungsen khaw pumpui chu April ni 1 (Ningani) atanga thu leh awm hma chu vawk hri lenna hmun (Infected Area) ah a puang tawh a.

Tlabung Civil SDO leh BDO Lungsen ni bawk Pu Lalsanglura pawhin Sec 144 Cr.PC. 1973 in thuneihna a pek angin April ni 2 khan thla hnih chhung awh khapna thupek a chhuah a. Lungsen khua atanga vawk phurchhuah emaw vawk lakluh khap a ni a, vawk thi reng reng paih mai lovin thuk taka phum tur a ni a, vawk damlo reng reng hralh emaw talh khap tlat a ni a, vawk hrisel tha pangai nia hriat talh tur neite chuan Veterinary Officer, Lungsen hnen atangin talh a him thu hriatpuina lehkha an la hmasa ngei tur a ni.

06.04.2021 khan AH&Vety Secretary Pi Lalzarmawii chuan The Prevention & Control of Infectious and Contagious Diseases in Animals Act, 2009 Section 6 behchhanin thuchhuah siamin Lunglei District pum pui (Lungsen tiam lovin) Controlled/Surveillance Zone/ Area-ah a puang a. Lunglei District Level Coordination Committee (DLCC) on African Swine Fever and other Trans-boundary Animal Disease (TADS) chu an Chairman Lunglei DC Pu Kulothungan A hovin 06.04.2021 chawhnu khan thukhawmin District chhunga hri a darh zel lohna tura hmalak dan tur an rel a. Lunglei DC-in District pawn atanga vawk lak luh khapna thupek alo tih chhuah tawh chu tha zawm leh kenkawh ni se tih Committee chuan a rel a. Lungsen khua leh a chhehvel atanga vawk phur ru an awm em tih uluk taka lo check turin Lungsen khaw daia Police check post ah duty dah ni se tih an rel a, Lunglei khawpui thlen hma Sazaikawna Forest Check Gate ah pawh duty ni se tih an rel. He hrileng kaihhnawiha a tul apianga hma la tur Task Force pahnih din a ni bawk a – Task Force at Infected Zone, Lungsenah leh Task Force at Surveillance Zone Lungleiah din a ni.

Dr M Zohmingthangi, Deputy Director (Disease Investigation & Epidemiology) kaihhruai Disease Investigation Team chuan Aizawl atangin 05.04.2021 khan Lungsen an thleng a. A hmun a hri len dan te zir chiangin hri darh zel loh nan ruahmanna te siam puiin phai lama thawn tur tissue leh blood sample te an la nghal a. He natna hri leng mek hi la confirm ni lo mahse, African Swine Fever (ASF) a nih theih avangin AH&Vety Department chuan ASF Prevention and Containment National Action Plan angin hma a la nghal a. Disease Investigation Team chuan vawk thi te phum dan tur zirtirna an pek bakah, Lungsen khaw chhunga YMA Branch hrang hrangte hnenah vawk thi sawngbawlna tur hmanrua hrang hrang - gloves, Sodium Hypochlorite leh potassium permanganate-te an pe a, vawk hri a darh zel lohna tura hmalakna turin Branch tinte hnenah pawisa fai cheng 7000 theuh an hlan a, vawk thi phumna tura khur laihna tura JCB hman na pawh a tul ang zela ngaihtuahpui an tum thu an sawi bawk. Disease Investigation Team te hian naktukah Lungsen an chhuahsan phawt dawn a ni.

African Swine Fever (ASF) hi India ramah chuan January 2020 khan Assam leh Arunachal Pradesh State-ah te hmuhchhuah hmasak ber a ni a; nikum August thla khan Meghalaya State ah hmuhchhuah leh niin kumin January thla khan Manipur ah hmuhchhuah leh a ni. ASF hi virus vanga thleng, vawk lam chi te tana natna inkaichhawn awlsam tak leh hlauhawm tak, a kai tawh za a za thihna thlentu a ni. Kan ram thenawm Myanmar-ah pawh he natna hrik hi hmuhchhuah leh finfiah a ni tawh a, tun chinah a hri danna (vaccine) leh a enkawlna tur bik damdawi ala awmlo a ni.

AH&Vety Minister Dr K Beichhua hovin naktuk (09.04.2021) chawhma hian Lunglei DC pisa-ah hmalak zel dan tur rel turin meeting neih leh a ni ang.