No.60/2021-2022

Aizawl, 8th April, 2021: Vawiin khan Sports &Youth Services Minister Pu Robert Romawia Royte chu MIZBA Boxing Hall, Ramhlun Sports Complex, Aizawl-ah 17th Mizoram Inter-district Boxing Championship Closing Function-ah Khuallian a ni a, he hun hi a hmanpui a ni.

Minister chuan Inter-district Boxing Championship buatsaihtu MIZBA hnenah lawmthu a sawi a, boxing chu Mizote theih zawng tak leh sports discipline hrang hrang zingah hlawhtling tamna ber pawl a ni tiin a sawi a. India rama khawpui thlanchhuah bik pariat zingah Khelo India Centre of Excellence atan Aizawl chu a tel thu sawiin, boxing tui mi leh zir duh tan kawng a inhawng zel dawn a ni, a ti a. Centre of Excellence –ah hian sports discipline pathum zir theih zingah boxing hi telh a ni a, sawrkar laipui bultumin zirlaite tan coaching bakah hostel fee, medical leh technical support te pek an ni dawn a ni tiin a sawi. Heng bakah hian high performance manager ten an thutchilh tur thu leh boxing coach advertisement pawh zau taka chhuah a nih thu a sawi bawk a ni. Khelo India Centre of Excellence, Aizawl-ah hian zirlai 100 sawrkar laipui bultumin chawm an ni dawn a, boxing zir duh thlan nan intihsiakna pawh siam tum a ni a, heta tan hian tun atanga tan la turin a fuih bawk a ni. District thar- Saitual, Khawzawl, Hnahthial-ah infrastructure awm miah loa, a tui mi ten district boxing association an lo din chu lawmawm a tih thu sawiin, an tumruhna te fakin Sports Minister a nihna angin district thar pathum tan boxing ring pakhat teuh a pek tur thu a tarlang bawk a. Minister chuan district 11-ah Khelo India kal tlangin sports hmasawnna lak zel a nih thu leh, Serchhip-ah hall an neihsa avangin Khelo India kal tlanga boxing zirna siam a nih tur thu a sawi a. Mizorama la awm ngai lo, Sports School panga siam tum a nih thu a sawi a bawk a ni.

17th Mizoram Inter-district Boxing Championship Closing Function-a hian District 11 atangin boxer 142 an tel a, weight category 28 awmin, senior division 10, junior division 10 leh sub-junior 8 a awm a ni.