No.59/2021-2022

8.4.2021: Chief Minister Pu Zoramthanga chuan vawiin khan Aijal Club-ah Mizoram Horticulture Service Association General Conference 24-na chu khuallian niin a hmanpui. Addl. Chief Secretary Pu J.C Ramthanga chu khualzahawm a ni bawk. Conference thupui hi "Horticulture for economic growth in Mizoram" a ni.

Chief Minister chuan ram economy hmasawnna atan horticulture chuan pawimawhna thui tak a neih thu a sawi a. Horticulture tharchhuah hrang hrang- thlai, thei, mau, pangpar, etc. hmanga intodelh mai bakah industry-te chawm a, state pawn leh ram pawnah te thawnchhuak turin Mizoram chuan ram zau tawk tak, boruak duhthusam leh ruahtui tha kan neih thu a sawi a. Chief Minister chuan hlawk zawk leh quality tha zawk tharchhuah a, a chawmtu tur lei tha leh ruahtui khawlna lamah tan la in, kuthnathawktute tan eizawnna ngelnghet tak kan siam theih tur thu a sawi. Chief Minister chuan bamboo development lama hmalaknate a sawi a. Heng hmalaknate zawng zawng hi environment tichhe lo thei ang bera kalpuiin, ram hausakna turin hma lak puiah kalkhawmte a sawm a ni.

Addl. Chief Secretary Pu JC Ramthanga chuan Horticulture department chuan hna tha tak tak a thawh thin thu sawiin, covid lockdown laia supply chain siam leh, hripui lenlai pawha horticulture tharchhuah (productivity) a hniam phah mai nilovin, a hma kum a khum zawk avang te in thawktute thawhrimna rah a nih thu a sawi a. Sawrkar hnathawkte chu hlawh la a dinhmun tha zawk luah tura awm nilovin, kan farmer-te an eizawnna a lo hlawk zawk a, an hlawhtlin theih nana hmalak puia theihtawp chhuah tur an nih zawk thu a sawi.

Vawiin MHSA general conference-ah hian Chief Minister chuan 'Restructuring of Mizoram Horticulture Service Cadre posts & Offices, 2020' lehkhabu an siam chu a tlangzarh nghal a. Programme hi MHS President Pu Vanlalnuntluanga Renthlei chuan kaihruaiin, Member thar lawmluhna Dr. Elizabeth Saipari, Director chuan neiin, theme chungchangah presentation Dr. Carmelita Lalchhanhimi Pachuau, Asst. Director hnen atanga ngaihthlak niin, MHSA Secretary Pu Lalremruata chuan lawmthu sawiin hun a khar a ni. Chawhnu lamah rorel leh inthlanna in a chhunzawm a ni.