No.58/2021-2022

Dated Champhai, the 8th April, 2021: Vawiin khan DRDA Champhai leh MZU Incubation Centre-te tangkawp buatsaihin Champhai District chhunga VC te pualin changtlung zawka Mahatma Gandhi Employment Guarantee Act, 2005 (MGNREGA) kalpui dan tur leh Pradhan Mantri Kaushal Vikas Yojana (PMKVY) chungchang inhrilhhriatna I&PR Auditorium, CHANEM-ah neih a ni. He hun hi District Bawrhsap Pi Maria C.T. Zuali chuan khuallian niin a telpui a ni.

Pi Maria C.T. Zuali chuan MGNREGA kalpui dan chu her danglam tuma ruahmanna kalpui mek a nih thu sawiin, sik leh sa awm dan, tha thawh theih zat leh hun sen tam dante zirchiang chung zelin ruahmanna neih a ni, a ti a. MGNREGA hmanga hnathawhte ngun zawka zirchianna chu State Institute of Rural Development & Panchayati Raj (SIRD & PR) Mizoram-in kum 2018 atangin a lo kalpui tawh thu leh ruahmanna thar hnuaia Schedule of Rate thar tur chu National Institute of Rural Development and Panchayati Raj (NIRD&PR) Hyderabad-in a buaipui mek thu a sawi a. MGNREGA hnuaiah huan lo ram tihchangtlun, tui hna leh leilung luangral tur venhimte chu ngaihpawimawh a nih thu leh line department nena tangkawpa hmalakna neih thin a nih thu a tarlang a. Ruahmanna thar hnuaiah inhlawh duh tak tak, mamawhtu tak tak inhlawhna dilte tan scheme chu kalpui hun a la awm dawn thu sawiin, a hu hova thawk lovin mamawh an awm dan ang zelin thawh thin a nih tawh tur thu a sawi a. VC kalkhawmte chu ni za inhlawhna kaltlangin khawtlang hmasawnna chhawrnahawm turte siama, mirethei chawikan leh huan lo ram tih changthlun kawnga tan la sauh sauh turin a chah a ni.

Khuallian chuan PMKVY hnuaiah thalaite eizawng thei tura thiam thil zirtir a tul thu sawiin, PMKVY hnuaia training theih trade 350 chuang zinga engemaw berah hna hmu thei tura training theih a nih thu sawiin, Champhai District Skill Committee thukhawmin Job role 12 vel training theih tura a thlan tawh thu a sawi a. PMKVY hnuaia training chuan India ram chauh nilo ram dang thleng pha eizawnna siam a tum avangin thalaite hna thawh tur siam sakna tur a nih hriain ngaihpawimawh a tul a ni, a ti a. Kalkhawmte chu Champhai District-ah tha taka PMKVY scheme kalpui a nih theihna tura hmelhriat turin a chah a, sawrkar pawmpui thlap thianghlim taka eizawnna kalpui turin district mipuite a chah bawk a ni.

Vawiin VC te puala inhrilhhriatna hun buatsaih hi Pu R.Lalnghakliana PD, DRDA Champhai chuan a kaihruai a. Pi R.Lalnunkimi, BDO Champhai hnen atangin Mizorama MGNREGA kalpui dan zirchianna kimchang leh her danglam tuma ruahmanna siamte ngaihthlak a ni a. Pu Brian Laldinsanga leh Pu Lalramchuana, MZU Incubation Centre te’n PMKVY kalpuina tura District Skill Plan duan dan zirtirna an nei bawk.