No.57/2021-2022

Aizawl, the 8th April 2021: Vawiin khan New Delhi-a thukhawm DoNER Ministry Parliamentary Consultative Committee hnenah Pu C.Lalrosanga, MP, Lok Sabha chuan Mizoram mamawh hrang hrang te a thlen.

Video Conferencing-a he Consultative Committee thutkhawmah hian telin, Pu C.Lalrosanga chuan Mizoram-a hmun hnufual bik te tana ruahmanna hran 'Special Package' siam turin DoNER Ministry chu a ngen. Bangladesh leh Myanmar ramri hrula inbiakpawhna leh inkalpawhna kawng tha zawk te siam a tul thu a sawi a. Lok Sabha MP chuan Aizawl thleng chauh nilo, Mizoram chhim tawp thlenga Rel kawng siam a rawt bakah ramri hrul hmuna inbiakpawhna thalo te siamthat vat vat tul a tih thu Consultative Committee chu a hrilh a ni.

Pu Jitendra Singh, DoNER Minister kaihhruai DoNER Consultative Committee, Central Sorkar Ministry hrang hrang aiawh te telna-ah hian Pu C.Lalrosanga chuan North Eastern Council thuam that leh thuneihna sang zawk pek tul a tih thu a sawi a. Hmarchhak bial hmasawnna chak zawk thlen nan NEC chu tun aia phuisui zawka thuam that a tul a ni a ti. Lok Sabha MP chuan Mizoramin thlawhna tumhmun a mamawh thusawiin, tuna Airport awmchhunah thlawhna service tam zawk siam a tul thu a sawi a. He thutkhawmnaa tel ve, Civil Aviation Ministry thuneitute chuan Lengpui Airport-ah hian thlawhna service tam zawk siam tum mek a ni, an ti a ni. Pu C.Lalrosanga chuan India ram dang nena lehkha leh bungraw inthawn tawnna Postal Service a that tawk loh thu pawh sawiin, Dak-a lehkhathawn a thleng har thin hle a ni tih a sawi a. Dak-a lehkhathawn thleng tlai thin tireh turin Dak lam hotute a ngen nghal bawk a ni.

Lok Sabha MP chuan hmarchhak bial tana Ministry hrang hrang sum ruahman hman tangkai a tul thu sawiin, Ministry hrang hrangin hmarchhak State te tana sum an ruahman 100 zela - 10% Gross Budgetary Support chu anihna ang taka hman a tul thu DoNER Ministry Consultative Committee thutkhawmna-ah hian a sawi bawk a ni.