Tarlan tawh angin sorkar laipui Rural Housing Scheme hnuaia mirethei inchung tur rangva sem kal zelah vawiin khan Aizawl South III MLA bial chhung chhungkaw 80 thlanchhuahte hnenah inchung tur rangva bundle 4 zela sem a ni.

Hemi puala inkhawm Aibawk BDO Office a neihah he hun hmanpuitu Parliamentary Secretary Pu KS Thanga chuan miretheite hmakhua thlira tanpuina sem thin chu a dawngtute tan malsawmna a nih rualin midangte tanpui theitu zawk nih hi malsawmna tak tak chu a ni a ti. Pu KS Thanga chuan hun hmasa lama mipuite hnena an lo tiam tawh leh thui tak an lo hlenchhuah tawh miretheite tana inchung tur rangva sem chu tun sorkar-ah pawh chak taka kalpui anih dan a sawi a, a mamawhte tan ngaihtuah chhunzawm zel pawh tum a ni a ti a. Rangva sem takte chu a hmanna tur dik taka hmang tura chahin Parliamentary Secretary chuan miretheite hamthatna tur sorkar ruahman reng reng ti chingpena lo beisei ve thin sorkar hnathawk tute pawh an awm chuan dim an ni lovang a ti.

Vawiina rangva sem inkhawm hi Aibawk BDO Pu R. Lalnghakliana'n a kaihruai a. MLA bial chhunga a dawngtu tur thlanchhuah dan tlangpui a sawi a ni.