No.3270/2021-2022

Aizawl the 3rd December, 2021 : Nimin (2.12.2021) khan Mizoram Rural Bank, Aibawk Branch hmalaknain Aibawk khua chu Cashless Area – ah puan a ni.

Sawrkar laipui hmalakna lian tak tihhlawhtlinna tur atana Digital India in a buaipui mek cashless transaction chungchangah Mizoram Rural Bank, Aibawk Branch chuan Aibawk khaw chhung chu cashless area turin theihtawpa an buaipui hnuah December ni 2 tlai dar 3 khan Pu V. Jaya Chandra, MRB Chairman, Pu C. Sangpu Vaiphei, AGM RBI RO leh Pu Chinlianmanga, BDO Aibawk te chuan a rualin puanzarna hun an hmang.

He puanzarna inkhawm hi Pu V.L. Zahawma, Regional Manager, MRB Network – I in a kaihruai a, Pu C. Rosiama VCP, Pu V. Jaya Chandra, MRB Chairman, Pu C. Sangpu Vaiphei, AGM, RBI RO, Aizawl leh Pu Chinlianmanga, BDO Aibawk ten thu tha leh benglut tak tak an sawi. He puanzarna inkhawm hi a khaw mipui huapa buatsaih chu hripui avangin a remchang lova hriat a ni a, chuvangin Aibawk khaw chhunga Sawrkar Department tin atangin aiawh 2 theuh bakah NGO hrang hrang hruaitute aiawh 2 theuh sawm an ni a. Aibawk khawchhehvel atangin Tachhip, Phulpui, Sateek leh Maubuang VCP te sawm an ni bawk.

Aibawk PHC ten an mamawh em em Inverter leh Printer chu inkhawmah hian Mizoram Rural Bank Chairman chuan CSR kaltlangin PHCthawktute hnenah a hlan nghal bawk a ni.

Aibawk Cashless Area atana puanzarna inkhawm neih zawhah hian kalkhawmten online transaction hmangin chawhmeh zuar thilzawrhte an lei nghal a ni. Cashless area-a puan a nih hnu hian Aibawk khawchhunga bazar duhte, chaw ei turte, inentir turte, sawrkar a pawisa pek tur neite tan leh dawr a thil lei tur reng reng tan pawisa kher pe lovin online payment hmanga pawisa inpek chu a theih tawh mai dawn avangin mipui te tan awlsamna nasa tak a thlen ngei an beisei bawk. Cashless Area a puan a nih theih nan hian Pu Ebenezer Lalhruaitluanga, tuna Aibawk Branch Manager hian kum 2019 atang daih tawh khan hmalakna hi a lo nei tan tawh a, Aibawk khawchhungah hian BSNL tower bak a awm lova, Airtel leh Jio hmang tam takten harsatna an tawh avanga an tum anga hmalak chak a har thu a sawi a. Chuti chung pawha Aibawk mipuite taihmakna leh tumruhna avanga Aibawk khua chu Mizoram puma Cashless area hmasa ber tura puan a lo ni ta chu a lawmawm thu an sawi bawk a ni.

Mizoram Rural Bank hian Sawrkar laipui programme hrang hrang tihlawhtling turin theihtawpin hma a la a, hmun kilkhawr ber thleng luhchhuakin mitinin Bank an dawr theih nan remchanna a hawnsak a, tun ah hian Branch 94 nei tawhin Mizoramah chuan Bank inzar pharh zau ber a ni mek a. Mipuite tan Mizoram Rural Bank chu a inhawng reng a, mipuite tana Bank hi dawr zel turin min sawm bawk a ni.