No.3271/2021-2022

Aizawl 3rd, December, 2021 : Vawiin khan DC Conference Hall, Mamit-ah Mamit District Electoral Roll Observer Pu Lalzirmawia Chhangte, IAS hovin Draft Electoral Roll 2022 kaihhnawiha hmalakna hrang hrang thlira thutkhawm a ni.

Mamit District Roll Observer chuan India ram chu mipuite zalenna ram a nih angin, dan hnuaia zalen taka kan duh ber kan vote theih chu Election Commission of India chuan a duh dan a nih thu sawiin chumi tur chuan Rolls felfai leh rintlak kan neih chu thil pawimawh tak a nih thu a sawi a. Kumtin Rolls felfai tak kan neih theihna turin ennawn thin niin, duh duh paih emaw, belh emaw theih a nilova, Mamit Election Officials ten dan hnuaia a nih tur ang thlapa, thun ngai leh paih turte an kalpui chu lawmawm a tih thu a sawi. India khua leh tui diktak te Rolls-a lut tura awlsam taka dilna an thehluh theih chu Election Commission of India duhdan a nih avangin online hmang pawhin dilna thehluh theih a nih thu a sawi bawk. Mamit District chhung atana Draft Electoral Roll, 2022 tarchhuah chu felfai viaua hriat thu sawiin a buaipuitu Election Officials-te chungah lawmthu a sawi bawk.

He hun hi Pu Lalfakzuala, Dy. District Election Officer, Mamit District chuan kaihruaiin Final Electoral Rolls, 2022 chu nakum January 15 ah tihchhuah tum a nih thu a sawi a. Pu Lalhmachhuana, Election Officer chuan Electoral Roll, 2022 chungchang sawizauna a nei bawk.

Draft Electoral Rolls, 2022 tarchhuah takah hian Mamit District Constituency pathumah vote nei mi 69341 awmin, mipa 35151 leh hmeichhia 34190 an ni. Polling Station hi 117 awmin vote nei punna hi 0.02% a ni.

Mamit District chhung Constituency pathum atanga Polling Station-a vote nei tam leh tlem dan hetiang hi a ni. 1-Hachhek A/C- ah hian Vote nei tamna ber chu Zamuang Polling Station niin Voters 1202 an awm a, a tlemna ber Sotapa Polling Station-ah voters 127 an awm a ni. 2-Dampa A/C ah Saithah Polling Station-ah vote nei tam berin Voters 1050 an awm a, Zopui Polling Station-ah Voters 49 awmin a tlemna ber a ni. 3-Mamit A/C -ah Damparengpui Polling Station-ah Voters 1180 awmin a tamna ber a ni a, Tlangkhang Polling Station-ah Voters 169 awmin a tlemna ber a ni thung a ni.

Mamit District Election Office chuan election kaihhnawiha hriat duh neite tan website tarlan deomamit.gov.in ah hian ngaihven theih a ni

Vawiin Meeting-ah hian Political Party aiawh, Sub Hqrs YMA aiawh, MHIP leh MUP aiawh leh DIPRO, Mamit te an tel a ni.