No.3272/2021-2022

Aizawl, the 3rd December, 2021: Mizoram Youth Commission leh Core Team on Skill Development, Khawzawl District tangkawpin an buatsaih vawkvulh chungchang inzirtirna, 'Skill Training for Piggery Farming' chu vawiin chawhnu dar 2 khan Pu James Lalnithanga, SDO (Sadar), Khawzawl District chuan KVK Training Hall, Khawzawlah a khar.

Training kharna hun Pu Lalruatzela Renthlei, Course Co-ordinator kaihhruaiah Pu James Lalnithanga chuan thu sawiin, vawkvulh inzirtirna training hlawhtling taka buatsaih a nih theih nana tha thawhtute zawng zawng chungah lawmthu a sawi a. Vawkvulh chu eizawnna hlawk leh tangkai, hralhna lamah pawh buaina awm lo a ni tih a tarlang a. Training chhuakte chu rilru nei tak leh entawntlak ni tur khawpa vawkvulh chhunzawm a, midangte tan pawha rawn tlak leh zirtirtu ni turin a chah bawk a ni.

Pu H. Lalramenga, SDC in training kalpui dan leh hmalak zel dan tur sawifiahin training chhuakte hnena certificate leh stipend semna hun a kaihruai a. Dr. Philip Lawmsangzuala, Course Instructor bakah trainees zing atangin Pu K. Malsawmdawngliana ten training report an pe a. Dr. Henry Saplalrinliana, Sr. Scientist & Head, KVK Khawzawl pawhin thu a sawi a. Pu K. Lalremruata, Dealing Assistant-in lawmthu sawiin hun a khar a ni.

Vawkvulh inzirtirna, Skill Training for Piggery Farming hi Mizoram Youth Commission hnuaia 'Livelihood Generation for returned migrant workers due to Covid-19 in the state of Mizoram' programme kaltlangin buatsaih a ni a, training buatsaihna sum hi North Eastern Council (NEC) atanga dawn a ni. Khawzawl District-ah hian District Core Team on Skill Development leh A.H & Vety. Department hmalaknain training hi kalpui a ni.

Khawzawl District-a vawkvulh training hi KVK Training Hall, Khawzawl Kawnzarah neih niin, District chhung khaw hrang hrang atangin mi 20 (sawmhnih) an tel a, tluang takin training hi an zo thei vek a ni. Training chhung hian stipend an dawn bakah training kharna programme-ah certificate leh vawkvulh inzirtirna thuziak an dawng theuh a, post training support atan vawkte pathum theuh an dawng dawn bawk a ni.