Food Civil Supplies & Consumer Affairs Minister Pu H. Rohluna chuan Rs,53,55,500/- senga sak FCS&CA, Aibawk Storage Godown chu vawiin khan a hawng.
He Godown hawnna inkhawm, Pu R.Lalvena, Secy. & Director, FCS&CA Department kaihhruaiah hian Pu H.Rohluna chuan Godown tha tak hawn theih a awm chu lawmawm a tih thu sawiin, khaw mipui ten tangkai tak a an hman a beisei thu a sawi a. A enkawlna lamah pawh dimdawi taka enkawl turin a chah a. Minister chuan buhfai tharchhuah lamah Mizoram kan intodelh loh avang leh ration card mila buhfai man man zawk a hralh chhuah tura buhfai lei anih vang leh chhungkaw tin hnena ration card pek anih bawk avangin sorkarin buhfai lei nan sum tam tak a seng a ni, a ti a. Food Security Act pawh Mizoram sum dinhmun in a zir loh avang leh inkaihruaina mumal a la awm loh avangin duh anga chakin hma a lak theih loh a ni, a ti a. Mipuite chu ram hruaitu te that ringawt beisei lo a, an tih theih tawk ti turin a chah a ni.
Bialtu MLA leh Parliamentary Secretary ni bawk Pu KS Thanga leh Parliamentary Secretary(FCS&CA) Col.ZS Zuala te chu Khualzahawm an ni a. Pu KS Thanga chuan a bial chhungin hmasawnna duhawm tak tak a hmu chu lawmawm a tih thu sawiin, Aibawk khua in tui harsatna an tawh pawh a sutkian nan Aibawk Water Supply Project siam a ni a, Project hi pawm tawh niin hna tan theih thuai a nih tur thu a sawi. Sorkarin a bialchhung hmasawnna a pek zawng zawngah lawmthu a sawi bawk. Khualzahawm dang Col. ZS. Zuala chuan bialtu MLA leh bial chhung mipuite thawh hona tha chu fakawm a tih thu a sawi a. Godown chu uluk taka enkawlturina chah bawk.
Aibawk khuaa Storage Godown sak nan hian Ministry Of Consumer Affairs, Food & Public Diatribution (Department Of Food & Public Distribution) in kum 2010 kum tir lamah Mizoram Sorkara FCS&CA Department hnenah pawisa a rawn pe a, a sak hna hi State PWD kuta hlan chhawn a ni a. He Godown zau zawng hi 254.90 sq.m niin buhfai pawh 250MT (2,500 quintal) dah theihna tura ruahman a ni. A building pumpui sak zawh nan hian Rs 53,55,500/- hman a ni a. A building hi Supply Department hnenah March 2013 khan hlan a ni a, 21 May 2013 khan an lo pawm (take over) a ni.
