Vawiin Chawhma Dar 11:00 khan Minister of Land Revenue & Settlement Pu JH Rothuama’n Champhai Zotlang-ah Sport Stadium Lungphum a phum.
UD&PA Department buatsaih Sport Stadium Lungphum phum a nih hnu hian Zotlanga Mangkhaia Hall-ah Khuallian Pu Jh Rothuama chuan thu sawiin, Champhai hi Sports lamah kan duai lova, Sokarin hetiang hmun min pe leh a ruangam a lang tan te, a hmunin a lo zir lehzel te hi a lawmawm em em a ni tiin kan thalai te’n practice na tur hmun tha an nei hi a lawmawm hle a ni. Champhai-ah Sports lamah lawmman lakannei teuh tawh a, vawiin tlaiah ngei pawh hmuah turkannei a, Sport lamah hmingkanchher hle a ni tiin helai ram hmun petu; an chhungkaw ro hial lo ni reng thin khawtlang tana ui lova an phalnaah lawmthu a hrilh bawk.
NLUP chungchang sawiin Minister chuan hlawhtling ngei turte chu pek zel tum a ni a, eng party pawh nise, thleibik awm lova mite lo dinchhuah vena a tan pek zel tum a ni a, mahse engahmah chan lo te chu pek tawh pawh pek chhunzawm tawh loh mai tur an ni a ti a, Sorkar hmasawnna tur atan hian Minister leh MLA te chauh hi an pawimawh lova, mipui nena tanrual a ngaiin taihmakna leh rinawmna nen Zoram hian hma ala sawn zel ang tiin Zotlang Field leh Stadium chu Zotlang leh Champhai tan chauh ni lovin Zoram pum tan a ni tih thu a sawi bawk.
Champhai South Bial chhunga zirna kawnga harsa zual bikte hnenah Labour & Employment kaltlangin tanpuina Rs. 2000/- chu Minister hian a sem nghal a, Ruantlang atangin In 100, Zotlang atangin In 100 hnenah vawiin hian pek an ni a, zirlai pakhat zelah Rs.2000/- niin chhungkaw pakhat ah Unau pahnih zel pek theih a ni a, karleh lamah hian Champhai South huamchhunga khua leh veng dang te hnenah sem leh a la ni ang. Heng zirlai chawmna hi kumdangah pawh Card renew a lak zel theih a ni.
Khualzahawm Pu TT Zothansanga pawhin thu sawiin vawiina kan hun hman ang hi hman chak ve khawdang tamtak an awm a, heihi kan hruaitu leh hotute’n nasa taka hma an lak vanga Sport Stadium puitling nei thei kan ni a, tun Sorkarah hian Infiamna lama hmasawnna tur atan Sorkain Cheng Vaibelchhe 171 hmang tawh in a la hmang mek zel a ni tiin Infiamna lam a thalaite rualawhna hria Sorkar kan nei hi kan vanneihna a ni ti bawk. Pu TT Zothansanga chuan Sport Stadium puitling a awm tawh dawn avangin Zotlang mipuite chu lo inbuatsaih ve tura ngen nghalin an tan eizawnna tha tak a inhawng ve nghal dawn a ni, a ti bawk.
Pu R. Lalhmuliana Jt. Director, UD&PA chuan Technical Report pein UD&PA Department Engineer te leh NBCC lam te’n Survey an neih tawh dan leh National Building Construction Corporation Limited ten Detailed Report an siam dan leh an bawhzui dan te a sawi a, Central Sorkar chuan Zotlanga Stadium sakna atan hian cheng Nuai 2238.69 an rawn sanction a, hei hi 10% Lumpsum Grant for North Eastern Region including Sikkim hnuai atanga hmuh a nih thu a sawi bawk a ni.
He sports stadium-a awm turte chu:-
1) International Standard Football Ground (100m x 64m). 2) Long Jump, Triple Jump & High Jump pit leh Runway. 3) 8-Lane Running Track 4) Weightlifting Hall 5) Concrete Gallery, mi 1500 vel thut theihna. 6) Commentary Room 7) VIP Room 8) Players changing room (Bathroom leh Toilet awmtel). 9) Sports Official Room te an ni.
He Prgramme DC Pu Lalthangpuia Sailo kaihhruaiah hian Zotlang VC Pu C. Laldenga pawhin he Stadium lo hlawhtlin theihnan a Zotlang mipuite hmalak dan a sawi a, Pu C. Lallianpuia Vice Chairman, Champhai Dist. Sport Committee pawhin infiamna lama Champhai hmasawnna leh hmingthatna te a sawi bawk a, Pu Lalenglawma Pakhoungte chuan lawmthu sawina hun neiin inkhawm hi tihtawp a ni.
