Vawiin khan Press Information Bureau (PIB) buatsaihin Aijal Club-ah ni khat awh media workshop neih a ni a. Aizawl DC Dr.A .Muthamma chu khuallian a ni a I&PR Director Pu David L.Thangliana chu Special Guest a ni.

Dr. A.Muthamma chuan media a kan thil hmu leh hriatte hian tuna khawtlang nun leh khawsak phung, a mi chengte rilru suk thlek dan leh dinhmun dik tak a entir a,  Mizoram media te thuziak leh sawiah a tha zawnga thil thlirna hmuh tur tam tak a awm hi thil lawmawm tak a ni, a ti. India ram hmun dangte nena khaikhinin Mizoram chu mihring nunhona leh khawtlang nunphung a la tha em em a, inpumkhatna leh inunauna kan nei a, mipui mimirin dan pawh kan zawm tha hle a ni, a ti a. Chutihrual erawh chuan harsatna nasa tak khawtlang anga kan tawh chu damdawi hmansual leh HIV/AIDS darh chak lutuk hi a nih thu sawiin Aizawl DC chuan theihtawp chhuaha do let a ngai a ni, a ti. Mihring rilru put hmang a tha zawnga kaihhruai thei turin media te an pawimawh a, Mizo khawtlang nun tichhe mek tu drugs leh ruihtheihthil dang do tur leh HIV darh zel tur venna kawngah nasa leh zuala tan la turin Dr.A.Muthamma chuan journalist kalkhawmte a fuih a ni. 

I&PR Director Pu David L.Thangliana pawhin thu sawiin print leh electronic media kan neih mek te thuchhuah hi mipuiin an ngai pawimawh a, rintlak leh belhchian dawl nia an ngaih thin avangin mipui ei tur an ziah leh tihchhuah zawng zawngah fimkhur turin journalist te a chah a. Khawvel thang zelah social media in mihring nun a chiah hneh tawh em avangin khawvel hmun tam takah social media chi hrang hrang hmanga thu diklo thehdarh avangin buaina leh harsatna a lo chhuak fo tawh thin a, Mizoramah erawh chutianga buaina lian tham kan la tawk ve lo hi a lawmawm a, a hmangtute pawh kan fimkhur a ngai a ni, a ti. Kan hma lawkah Mizoramin inthlanpui kan hmachhawn dawn avangin media te pawimawhna a nasa leh zual dawn tiin I&PR Director Pu David L.Thangliana chuan thu thar thehdarhna kawngah thu belhchian dawl, rintlak leh finfiahna awm ngei chhuah thin turin a chah a ni.  

Media Workshop hawnna programme ah hian PIB, Aizawl Asst.Director Pu Shariq Noor chuan kalkhawmte lawmna thu a sawi a. Interactive session neih chhunzawm nghal niin Role and impact of print media in Mizoram, New Media in Mizoram, Ayushman Bharat, Social Media and Security Concern, Present media scenario in Mizoram tih thupuite hmangin sawm bik ten thu an sawi a ni.