Vawiin hian Serchhip District MJA member pasarih, NEDP Multimedia Campaign hnuaia District chhunga sawrkar hmalakna thenkhat tlawha kal mek ten N. Vanlaiphai Leilet dung an fang a. Agriculture Department hmalakna te an en ho.

N. Vanlaiphai Leilet dungah hian chhungkaw 200 chuangin leilet an nei niin Agriculture thawktute hian an sawi a. Tun hnai kum reilote chhung pawhin he phai dunga sawrkar hmalakna hi a tam tham tawh thu sawiin vawiina MJA member te hnenah hian tun kum hnih khat chhung maia an hmalakna tlangpui chauh an lo hrilh a ni. Kum 2018 chhung hian Link Road thar hmun hnih, belhkhawma 3kms leh kawng awmsa chei that engemawzat an nei a. Phaidung II zau leh Chawngtui Peng inkar phei chu Lung an phah ani. Heng bakah hian side drain 3.23 kms ah siamin Culvert hmun 7 ah an siam bawk. RKVY hnuaiah loneitu 83 te hnenah Chinai thi qtls 153.2 an sema, PKVY hnuai atangin Chana chi kg 400 an sem ral bawk. Tin, heng bakah hian Custom Hiring Centre kaltlangin tractor hi 2 pek an ni a, Grass cutter hi mi 5 te 50% subsidy a pek niin loneihna hmanraw chi hrang hrang subsidy in an pechhuak nasa hle bawk ani.