Vawiin khan PWD, I&PR leh Health changtu Minister Pu Lal Thanzara’n Khawbung ah 33 kV Sub Station a hawng.

Pu Lal Thanzara chuan kawlphetha lama intodelh chu sawrkar ngaih pawimawh berte zinga mi a nih avangin theihtawp chhuahin hma lak mek a ni, a ti a. Megawatt 4 pechhuak thei tur Tlawva Small Hydel Project chu sawrkar kum 2018-19 chhunga zawh beisei niin hei hian East Tuipui bial khaw hrang hrangte tan power lamah hmasawnna nasa tak a thlen dawn a ni, a ti. Kawlbem Small Hydel Project, Megawatt 5 pe chhuak thei pawh kum 2019 chhungin peihfel tum a nih thu leh 25 MW pechhuak thei Tuirini Hydel Project chu BRICS Bank atanga loan lak a khuah tum a nih thu te, ni zung  hmanga kawlphetha siamchhuahna tur  Vankalah  Solar Park dah tura ruahmanna a kal mek thu Pu Lal Thanzara chuan a sawi bawk. 

Power lama hma lakna dang Minister-in a sawi zingah World Bank Project hnuaia POWERGRID in W. Phaileng, Marpara leh Lungsena Sub Station thar sak mek te; Khawiva 132 kV Substation tihlen tum te; W. Phaileng to Marpara  leh Lungsen to Chawngte to S. Bungtlang-ah 132 kV line thar siam a nih tur thu te; S. Bungtlangah Sub-Station dah tur chungchang te a tel a. Power & Electricity Department hnuaiah, Melriat to Lunglei line hna hi sawrkar kum 2018-2019 chhunga peihfel tum a ni, a ti bawk. 

East Tuipui bialtu MLA Pu T.Sangkunga pawhin thu sawiin Khawbung 33/11kV Sub Station hawn a ni ta chu a chhawr tangkai thei tur Khawbung leh a chhehvel Dungtlang, Samthang, Zawlsei leh Khuangthing tan ni chhinchiahtlak tak leh hmasawnna kawnga rahbi thar an kaina ni pawimawh a nih thu a sawi a. Bialtu MLA a nih anga lawmawm a tihzia sawiin East Tuipui bial chhungah sawrkarin hmasawnna hna kawng hrang hrangin a thawk tawh a, a thawk zel dawn a ni, a ti. 

Khawbung 33/11 KV Sub-Station hi State Plan Assistance atangin cheng nuai 397.25 senga siam a ni a. A line thui zawng 33 KV Khuanglen Sub-Station to Khawbung 33 KV Sub Station hi kilometre 30 a ni. 

Hawnna inkhawm hi Power and Electricity Department Engineer-in-Chief Pu Lalramliana’n a kaihruai a. Pu J.Lalhmachhuana, EE, Power Project Division, Champhai in Technical Report a pe a ni.