Vawiin khan Hlimen Zophei Ram a Local Administration Department hmalakna -Lalsavunga Park chu Chief Minister Pu Lal Thanhawla chuan khuallian niin a hawng. Park hawnna inkhawmah hian LAD Minister Pu P.C. Lalthanliana leh Agriculture Minister Pu K.S Thanga te chu khualzahawm an ni a. Dy. Chief Whip Pu R.L. Pianmawia leh Chief Information Commissioner Pu Lalduhthlana Ralte te pawh he programme-ah hian a tel a ni.

Chief Minister Pu Lal Thanhawla chuan khawpui atanga hla lo te ah hawi khawthawnna hmun nuam siam a ni chu lawmawm a tih thu sawiin, a puitlin theih nan a hmalatu zawng zawng chungah lawmthu a sawi. Chief Minister chuan mihring te hian intihhlimna leh hahchawlhna kan mamawh a, ram changkang apiangah hmun thengthaw nuam hahchawlhna an ngaipawimawh a, an khawpui lun berah pawh a khat tawkin park an siam thin thu a sawi a. Vawiiah chutiang ang hmun hawn a ni chu lawmawm a tih thu sawiin, LAD in Mizoram hmun hrang hranga ramngaw humhalh pah a park nuam tak tak an lo siam tawh thu a sawi bawk. Chief Minister chuan ramngaw leh nungcha humhalh kawnga Mizote harh thar pawimawh a tih thu sawiin, kan khawvel chen tinuam zel tu tur a ni a ti a. Tui hna humhalh kawngah te, ram kang do kawngah te pawh kan harhchhuak zel hi a lawmawm a ni, a ti. Pu Lal Thanhawla chuan fai kawngah kan thangharh nasa hle a lawmawm a, vawiina Park hawn tak vawn fai lamah pawh a chhunga lut zawng zawng te mawhphurhna vek a ni tih kan hriat a tul a ni, a ti a. Zawi zawiin helai park hi changtlung zawk leh intihhlimna leh infiamna chi dang dah belh zel tum a nih thu sawiin, tangkai taka hun rei tak mipuiin an hman tangkai zel a duhsak thu khuallian chuan a sawi bawk.

Minister Pu P.C. Lalthanliana chuan park siam puitlin a ni ta chu lawmawm a tih thu sawiin, "helai hmun hi nawmchenna tura siam a ni lo a, chen nawmna tur atan a siam a ni" a ti. Khualzahawm chuan 

park chu LAD thawh rah chauh nilovin a tir atanga local council, department dangte leh mimal, khawtlang, kohhran leh tlawmngai pawlte atanga ram leh tha an thawh avanga puitlin tak a nih thu a sawi a. Lalsavunga Park chu hmun nuam tak la ni zel tur a nih thu a sawi a. Minister chuan Mizote chu vantlang thil mahni ta a en thiamlo hnam kan ni a, hmun tha leh nuam kan neih te hi a hlut zel theih nan vantlang hmun mahni ta a cheiin, vawng fai zeltu ni zawk ang u tiin mipui a sawm a ni.

Minister Pu K.S. Thanga chuan park thar nuam tak hawn a ni chu lawmawm a tin thu sawiin, khualzinte hiptu tha tak tur nia a hriat thu a sawi bawk a. Mi ramah chuan nungcha a tam avangin khualzinte hiptu leh tihlimtu a ni ber thin a, keini ramah pawh nungcha hmuh tur kan neih thin, ramngaw kan lo tih chereu avanga awm ta lo te kan koh kir theih nan hma la ila, tourism tihhmasawn nan a tul hle dawn a ni, a ti a. Aizawl South-III bialtu MLA chuan park thar chu a kal apiangten uluk leh thianghlim taka an vawn vek a beisei thu sawiin, kan chettlatna apiangah thianghlimna kan zir a nunpui a pawimawh a ni, a ti.

Vawiin Lalsavunga Park hawnna inkhawm hi Pu R. Lalramnghaka, Special Secretary, LAD chuan kaihruaiin Pu Zosangliana, E.E., LAD chuan project report a pe a. LAD Director Pu R.S Lalzamliana chuan lawmthu sawiin programme hi a khar a ni. Vawiin programme-ah hian LAD leh sawrkar Department dang hotute bakah Hlimen khaw mipuite an tel thahnem hle a ni.

Park hi kum 2014 atang khan siam tan a ni a, a vaia sum sen chu Rs. 464.18 lakhs niin department budget a sum dah hmanga bultan niin, .. siam puitlin nan hian NEDP atanga sum hmuh hman a ni. Park hi 300 bigha bawr vel a zau niin, a innghahna tlang dung sei zawng hi 1km a thui a ni. Park chhungah hian kawngpui black top 0.544Km leh RCC kawngpui 0.400Km a thui a tlan a. Hmun remchang lai laiah RCC balcony 11 siamin, PCC Footpath 0.82 Km a thui a kal bawk a. Suspension bridge 27metre a thui dawh a ni a, heng bakah hian Rest Shed 4 leh Mini Rest Shed 11, naupang infiamna playground, view tower, cabin, meeting hall, restaurant leh staff quarter te park chhungah hian a awm bawk.

Park luh man hian naupang tan cheng 20, puitling tan cheng 50 leh kum upa lam tan a puilting luh man chanve a bithliah a ni a. Pawl leh group mi 20 chuang a ruala kal tur tan discount pek a ni bawk ang. Meeting hall hman man chu ni khatah cheng 1000 bituk a ni a. Park ah hian Cabin 3 awmin, darkar bi a hmang tur tan darkar khat ah cheng 200 bituk a ni a, ni khatah cheng 800 in a hman theih bakah zan riah nan zan khat atan cheng 800 chawiin a hawh theih bawk a ni