Vawiin chawhnu khan  I&PR Minister Pu Lal Thanzara chuan Khuangleng khuaa Helicopter tum hmun tur  Helipad thar a hawng.

A hawnna inkhawm tawi buatsaihah Pu Lal Thanzara chuan   Khuangleng khuain Helipad thar anei chu a lawmpui thu leh ni chhinchhiah tlak, hmasawnna  rahbi thar   kaina ni pawimawh tak anih thu a sawi a. Chief Minister  kaihhruaina hnuaiah hmasawnna hna chak taka thawh anih thu sawiin, NLUP hmangin kuthnathawktute tana eizawnna ngelnghet siamna kawngah te, NEDP hmangin rualkhai zawka  khawpui leh thingtlang lamahte hmasawnna thlen tir kawngah te nasa taka tha thawh a ni, a ti a. Heng bakah hian zirna leh hriselna kawngahte, thalaite tana khawvel thar siamna kawngah te leh kawng dang tam takin hmasawnna chu a taka hmuh a nih thu a sawi a.  I&PR Minister chuan hmasawn turin hna thawh mai a tawk lova, kan rilru sukthlek leh kan ngaihtuahnate pawh kan thlak a, hmasawn duhna rilru kan put hi thil pawimawh tak a ni, a ti bawk.

Minister chuan kum 2012 August thla atanga Mizorama Helicopter Service tan tawh chu District hrang hrang leh khaw pawimawh zual biakahte service tir anih thu sawiin, duh angin mipui mamawh kan phuhru zo loh avangin sawrkar laipuiah dil belh leh mek anih thu a sawi a. Helicopter service chu hlâwkna ûma kalpui ni lovin, mipui rawngbawlna atana kalpui anih thu leh rîkrum thilah leh damlo na zual, nun chhan hmanhmaw thlakte tana tangkai tak a ni, a ti a. Khuangleng chu a khaw chheh velte tan lawi len a remchan avangin Helipad siam ani tiin, khawtlang tana ro tling, rikrum thil leh damlo serious tak takte tan mai bakah, a mamawhtu mipuite tana malsawmna ropui tak  enkawl leh ven him kawngah mitinte neitu thinlung pu thin turin a chah nghal bawk a ni.

East Tupui bialtu MLA Pu T.Sangkunga pawhin a bial chhunga Civil  Helipad  hmasa ber tur hawn a ni ta leh Pu Lal Thanzara’n a hun hlu tak senga a rawn hawng thei chu lawmawm a tih thu a sawi a. A bial chhunga PMGSY hmanga inkalpawhna kawng tam tak tihhlawhtlin leh sanction a nih theihna leh eng lama intodelhna tura Power Sub Station thar 3 hawn anih theihna tura Pu Lal Thanzara puihnaah  bial aiawhin lawmthu a sawi nghal bawk a ni.

A hawnna inkhawm neih dawnah hian Mizoram-a Service mek Pawan Hans Helicopter hi Helipad-ah hian Minister leh a tawiawmtute  phurin a rawn tum a. Khuangleng khawtlang mipuite leh Sawrkar Official-ten    an lo hmuak a. Khuangleng hi Aizawl atangin minute 25 vel thlawk niin, damlo tan charter theih ani nghal ang a, Charter rate hi dar kar khatah Rs. 80,000  a ni ang.

Hawnna puala Inkhawm hi Pu Vanlaldina, Vice President, Khuangleng VC in a kaihruai a, Pu Lalrinthanga, VCP Khuanglengin lawmthu sawina neiin hun a khar a ni. Minister hi Pu T.Sangkunga, East Tuipui bialtu MLA; Pu Lalramliana, Engineer-in Chief, P&E; Pi Lalnunmawii, IPRO; Pu Abraham Beirazi Khithie, SDO (S) Champhai leh Dr Lallawmkima, DIPRO Champhai-ten an tawiawm a ni.